U naše molo misto gruobje je navr Glavice,da bi do njega duošli va bit skoro mlod i zdrov, nojpri vajo pasat od pijace nimo Trutinovu kuću i onda uza skaline... E danas su mi tie skaline pale napamet!!!

Veći dil vega ča ću napisat zno većina Hunčanih ali kuoguod će proštit čaguod novega. Prvuo ni se oduvik hodilo ovuda na gruobje, nikada je put bi kroz današnji dvuor Stopinih (onih od Jokie), hodilo se oza Crikvu onda je bi pruoguon, nimo kuću i uzbrdo opod koprivac a put je izahodi isprid trafostanice onuod di je sad loza drugima Stopinima od vrtla ča su ga kupili u Jubota Lukieša. Sudeć prima nemu kakvi je tuda terien siguro ni bilo lipo nosit mrtvaca ni onda. Radi tega su Hunčani naumili ugrodit drugi put; oni koji mi znomo pod imenon Skaline. Onda je "Glavor" bi Jakov Carević, i uon je dogovoro posol i tako je pito Fronu Trutota da mu pusti komod vrtla za put, i ovi je pusti za selo. Onda se ondašnjo Općina učinila pametna (lako je sa tujin smriške tuć) i iskala da in Hunčani plotidu općinsku zemju. Frone Truto je isko da se onda i njemu ploti i bilo mu je ploćeno tako da se ti račun odbi od vridnosti općinske zemje i to je bilo ploćeno tristišest krun jer je tako procini ondašnji pašćik Ivon Gronče. Facode za skaline je iskopo Stipe Tutić, a uon ih je i ukreso. Njemu je ploća bila komod zemje sa grmuon ali to neznon di i koliko. Ču san da je dobi komod u Prosičine ali to ni nikad provedeno kroz libre... Da se kuo ne bi zabuni i misli kako uon poznaje sve ovie jude, to bi tribali bit nuonoti ovih ča danas jemodu to isto imena i nadimke...

To je ono ča jo znon od onda, ono ča svak more pogledot danas je godina ukresona na trećon skalini ispod gruobjo 1889 i tri slova J F C; ča bi po meni tribalo bit Josip Franjo car, ali brž je i oni koji je grodi stavi svoje ime... Jesu i skaline grodili Prodani ko i gruobje neznon, zolnje ča san ču da je godinu i slova napiso Jure Vrsalović Carević Luongo, brat od Petrušine, a obo njemo imo por sluov na drugo misto jer je poginu u Prvien ratu. Ču san i to da je oni ča je grodi napiso godinu i svoje ime ali mi se to onda ne poklopo, tin veće ča se Jure rodi 1886. Skalini velih jemo 47 i tri do rašteli od gruobjo ča je skupa 50 i još tri u gruobju iza rašteli, u to nison broji ko skalinu raštela napodan skalini.

Kako u nos uvik jemo problemi, ondašnjo raštela kojo su bila stavjena napodanak skalini, bila su tisna za modierne sprovode i srušena je jedna glova 1970 i nikie godine, to je tako stolo godinami,a onda se obnovila i drugo glova, ali bez raštelih. Kad se kopalo za vodu cijevi su išle kroza sri skalini i one su se raskopale ali su se opet vrotile na misto, ali da ne bi bilo bez problemi kad se asfaltiralo voljak je udri u obe glove, polomi dil facodi i rašundro hi, To je opet stolo tako nikuo vrime. Mjesni odbor u kojien san bi jo, Miko Vrsalović... a "glavor" je bi Teo Perić, krenuli smo to napravit, nabavili smo sve facode, dogovorili raštela obnovit sa kovočon u Siecima i uon je bi vaze storo raštela. Dogovoreno je bilo da se na storo raštela dodo još dil u sridi za pokrit svu širinu. Kako se ti mjesni odbor raspo a da se to ni finilo jo ko vjećnik san u općini iško da se izabere novi i tako je i učiveno. "Glavor" je posto Nikša Tomić, a u njemu je bi i Ivica Cigo. Kovoč (Antonio Ursić) je nakon puno peripetiji napravi novo raštela a ča je bilo sa storima neznon, je ih komu prodo ko ča je posol naploti i od poteštota Puljka i od Alena Parunova ili je čo drugo; svakako se nisu vrotile nose. Nakraju je mjesni odbor sa glavoron Nikšon i Ciguon, ugrodi ponovo glove i namisti vrota, ča in je za svaku pohvalu i ča hi moran pofolit jer san hi jo nojveće i kritikovo, a to ću činit i daje kad buden misli da je potriba...

Zolnji put su se skaline do trafostanice raskopovale pri tri godine i napravjene su za svaku pohvalu. Mislin da su hi namišćali meštri iz Seloc...