Danas san bi u Split i hodi vidi Stipu Tutića...

Pito san ga za zdrovje i još nike stvori a jedna od njih je i Velo Kopriva sa Pijace...

Kako se uon spominje Kopriva je ispilona 1935-36. Nezno ko je odriedi da se makne ća ali nikie stvori mi je ispričo: Bilo je to ogruomno stablo, grone su se širile od crikve do skule, a nikie grone su pritile da rašundrodu ploče na skuli, njih su pri ispilali. Okolo nje su bile tri skaline od stinjo stivone uokolo i na njima se sedilo i ćakulalo. Kad se išlo Koprivu maknut te facode su duperone za ugrodit zidić ispod komižanove kuće. Govori da Kopriva ni bila poginula, da je bila zdrava. Čini mu se da je jednu gronu od popove kuće skriečilo nevrime a nie grone ča su pritile raškajat skulu su se ispilale. Kad se išlo maknut je onda su nojpri makli skaline i isikli korienje, čini mu se da se na nju uspe Zone Rovinjež i viezo je a onda su je obolili na zopod. Ne spominje se ko je je siko (pilo) a ni koliko je bilo drvi u njuon. Njeguov otac, Visko je za hrieb ploti ondašnjih 10 dinari, ča je bila jedna žurnota. Ti hrieb je onda Stipi, ditetu od 7-8 godišć bi visok do brodie, a ispilono je bilo dobar mietar širinie. Visko ga je priboci u Tutići u dvuor i tuod je sto nikuo vrime. Kad mu je zasmieto onda su ga pribocili ispri konobe di je turan. Ti hrieb je sto tuod ko stuol godinami, da bi ga na kraju kad je prognji Stipe iscipo za drva...

Ako neznomo kuo je nariedi i zoč se ispilala Kopriva neka se zno bare kako se to odigralo...

Ispričo mi je još jednu stvor kojie se malo kuo danas u selu već spominje: Po sri duonje pijace je bi usodjen još jedon ried stabol, koji mi je spomonjo i pokojan Ćaća, ali nezno zoč i kako su to stabla nestala. Meni je Ćaća govori da su se rovinovali kako se igralo na buće i da su tako poginula...