Niki dom me zamoli Miro Rovinjež da iden vidit je mu kojo loza pala na Prsnacu od Velega goja i ako je da neka zagrodin. Tako san i učini: zatvori san jednu lozu i dvi-tri šćrbine. 6 E sad, dokle san to grodi siti san se dvo čovika od kojih jedniega nison ni jemo prigodu vidit. Govoru da je stori Zone Rovinjež bi čovik teške noravi, ali i veliki rodnik. Ako bi uon čo zapenso učinit to bi učini po svoju. Jo ga se spominjen ko storega čovika. A evo žoč mi je po napamet uon i šer Tuoni Carević, bili su oni priateji neka je Tuoni bi dosta stariji, evo obo čemu se rodi:
Maškino jedonput Zone kraje duoca u Prsnacu,ma ne da bi istuko kupinu nego duboko da je mogo odma sodit ča je ti i izmeće stinje vonka na gomilu. Pasoje tuda šer Tuoni na konju i javijemu se, recmo: "Šer Zone nemojte se umorit!!! A ča to činite?"
-Odgovoro mu Zone: "Evo san se ćapo ovih krajih i naumi ih dovest u kulturu."
-Gledo ga šer Tuoni di se zakopo priko puo mietra i pito ga: "A jeste vi šer Zone napravili računicu za to?"
-A Zone će: " Kad jo čo naumin, ne gledon računicu nego to učinin..."
Na to je šer Tuoni slego ramenima i somo reko: A ti Zane onda maškinaj..."
Nieće bit Zone pravi računicu, ma je i danas lipo vidit gomile okolo duoca u Prsnacu i zanavik ćedu ostat ko spomenik jednien veliken trudu i lavuru. 5