Pri nikega vrimena san skenirajuć store slike nošo dvo koji su poginuli u Prvien ili kako su onda govorili Veliken ratu. To me malo povuklo i išo san iškat koliko je Hunčani poginulo u ton bikariji a da se posli tega ni obo njima baš puno govorilo i nošlo hi se... Nison jemo di puno iškat ali nošo san ovo:

1. Marčić Ivan Kolinčor, 1888 - 1916.03.31. sa napomenon uz njega da je umri u ratu. Njega su po ocu zvoli Tončić, ćaća mu je bi Toma a mater Vica - Barbara Brizić; oženi se 1908 sa Anicon Šesnić.

2. Marinelić Juraj Bieg, 1879 - 1915.10.24. Poginu je u ratu na talijonskon fronti. Otac mu je bi Frone (umri tri godine kašnje) a mater Petronila Petrić. Bi je oženjen za Belu a ona se kad je ostala udovica udola za njegovega brata i od njih dvo su današnji Begovi, Jurini potomci su u Huncu, a brat mu je jemo dvi ćere i njihovi su danas u Splitu...

3.Marinelić Stjepan Pićulin, 1888 - 1916.03.07. Po obajvesti Crvenog Križa od 15.06.1916. poginu je u ratu u Srbiji. Otac mu je bi Ivon a mater Jera Eterović. Od njegove braće su pročedili današnji Pićulinovi. Iza njega je ostala lipo šoneta ča mu je do učinit niki njegov priatej.

4. Šesnić Juraj Tutić; 1896 - 1915.11.15. somo sa napomenon : na ratištu... Otac mu je bi Stjepan a mater Jera Vrsalović, i brat mu:

5. Šesnić Bartul Tutić; 1891. 02. 13 - 1916.07.23. Otac mu je bi Stjepan a mater Jera Vrsalović, treći vojnik Visko se vroti doma i njegovi potomci još živedu u Huncu.

6. Šesnić Ivan Firo, 1887 - 1917.02.12. Poginu je na talijonskon fronti. Otac mu je bi Stipon a mater Vica Šćepanović Kjunčević.

7. Vrsalović Carević Luongo Juraj - Jerko, 1886 -1916.02.28. Bi je ranjen i umri je od tega u vojniškon buolnici u Ljubjani. Otac mu je bi Mote a mater Kate Jugović. Brat mu je bi Petrušina a sestra Domina.

8. Vrsalović Carević Komižanin Juraj (Zuore), 1877 - 1918.03.24. umri je u vuojnon buolnici u Mostoru. Otac mu je bi Mote, a mater Marija Vrsalović Carević. Bi je oženjen i jemo dvi ćere... Govorilo se da je uli acida u uho da bi ogluši i da je radi tega umri...

9. Vrsalović Carević Franjo (Keko), 1876 - 1918.06.28. Poginu je u ratu u Crnon Gori. Otac mu je bi Jakov a mater Margarita Brizić. Brat mu je bi šer Tuoni Carević, a sestra Mila od Petrušine

(Ovo san započe ovu stvor a kako bi mi judi mogli dat odma ako još čo znodu odma ću i objovit. Kad još malo pročešjen stvor proširit ću vo ča san napiso, tako da se vo današnjo omladina more viezat sa vima judima. Imodu oni svuojte i nasljednikov i u Huncu i naokolo...)