Malo pri su me pitali obo proslavi dona žien u Huncu... Pri dvi ipo godine san već na vien blogu već piso obo temu na Esperantu a sa ću malo za domoći svit:

Virujen da nimo Hunčanina koji nezno ča se dogodilo na uosmi morča četrdesiet četvrte godine prošlega vika. Rano ujutro njemaška soldateska je duošla u Humac i pokupila sve muške ča su nošli a godine nisu bile u pitonju, malo kojo veće dite se izvuklo, somo obo tien ću drugi put jer imon voju napisat čaguod slično tekstu o spomen ploči, di bi nave svakega napose, kad je rojen i od koje je fameje, za to mi se oće veće vrimena. Sada somo da odgovorin na ono ča su me pitali, jer mlaji to brž niećedu znat...

8. ožuljka (marta) ili po našu uosmi morča se u normalnen svitu slavi ko "Međunarodni dan žena"... Nažalost od 91. se u Hrvasku baš i ni puno spominjo jer su to tobože izmislili komunist.Dil mišćani je iz poštovonjo prima ženami ti datum jin i čestito, za pravo govoreć digod bin bili čuli da se više ne slavi "dan žena nego crkveni blajdan Majčin dan"... Jo to baš nison obadovo jer mislin i da onie žene ili cure ča nisu rodile miritodu cvit i lipu rič (i ne somo jedon don u godini). Donosi san jo na ti don prvie jubice materi, curami, ženi i ženami... Ali ovuod dohodimo na ono ča su me pitali danas: od Rata (drugega sviskega) do 91. godine nikad žene ni organizacija žien koju san jo poznavo pod imenon AFeŽe nisu pravile feštu na uosmi morča, na svuoj don, baš radi tie nesritne sridie iz 44. Malo kojo je bila žena u mistu da ni bila u rodu sa nikin ki je tad ubivien, tako da su se dogovorile jednu drugu stvor: Grubo je na skuodnji don feštat i oni su feštu pribocile za prvu subotu posli. Ča jo znon to se od onda somo jedonput ni poštivalo, pri por godin se frajalo na uosmi ali se isto išlo u drugo misto... Jo ne mogu sudit nikomu, svak neka rodi kako zno i prima svojon pameti, ali bi zamoli ako ko već kad organizirat feštu za "Dan žena" da to za naše mišćanke ne čini na ti don nego subotu iza... Na ti nočin će pokozat da se u naše misto ni zaboravilo ni na ono 23 Hunčanina i don Kuzmu Šimunovića ča su na ti don napustili ovi svit bez potribe.

Svima Ženami želin da in ti don bude jedon od lipih don u godini, da ih njihovi muški lipo gledodu svu godinu a ne somo za ti don i da nikad već niti jedna ne dobije dor kakvi su dobile naše mame, none, pranone 44!