Protestoj en Moskvo 

Kvindeko da subtenantoj de la opozicio kolektiĝis en centra Moskvo la 3-an de decembro por fari simbolan "enterigon de demokratio" ĉe la konstruaĵo de la Centra Elekta Komisiono. Ili tamen ne povis aliri proksimen, ĉar granda kvanto da policanoj kaj bariloj fermis la vojon. Baldaŭ aperis anoj de la porputina junulara movado "Juna Rusio". Ili kriadis "Putin! Rusio!" kaj funkciigis artfajraĵojn. Ankaŭ la alia flanko kriis sloganojn, sed neniuj perfortaĵoj okazis. La polico baldaŭ dispelis la manifestaciantojn, por tio sufiĉis admonoj en megafono.