1u de mayu FUSOA 2009 

La séptima edición de la “Folixa del Primeru Mayu” llevará a Habeas Corpus al CSOA “La ReFLEXón”

Otru añu más les reivindicaciones obreristes d’un día como’l Primeru de Mayu améstense n'Asturies a la folixa y a la música cola cellebración de la séptima “Folixa del Primeru Mayu”. Nesta nueva edición, el FUSOA (Fondu Xunitariu de Solidaridá Obrera d’Asturies) traerá al xixonés CSOA “La ReFLEXón” a Habeas Corpus, Skontra, Dakidarría y Arrabuñazo.


El Primeru de Mayu ye una hestórica fecha señalada nel calendariu como’l día del trabayador. Nesta xornada milenta trabayadores de tol mundu salen a la cai a manifestar el so arguyu de clase y reivindicar meyores nes sos condiciones llaborales. N’Asturies, esti día vien garrando un cálter folixeru y reivindicativu altraviés de la “Folixa del Primeru de Mayu” eventu que, dende va siete años, entama la caxa de resistencia FUSOA.


La nueva edición d’esta folixa tendrá llugar el mesmu vienres 1 de mayu a partir de les 18.00. Nella, l’escenariu de la fábrica okupada de la FLEX cuntará cola presencia de la banda hardcore Habeas Corpus como cabezaleros de la nueche. Los madrilanos aprovecharán la ocasión pa presentar “Rarezas”, décimu trabayu recientemente asoleyáu que recueye versiones d’otros grupos, cantares inéditos, y temes d’Habeas Corpus en clave electrónica.


Completen el cartelu d’esti conciertu Skontra, banda punk-folk asturiana qu’esti 2009 ta pisando perimportantes escenarios estatales na presentación del so segundu trabayu: “Cantares pa dempués d’una guerra”; Dakidarría, formación punk-ska gallega que llegó por primer vegada a Asturies el pasáu marzu d’esti añu y Arrabuñazo, grupu de rock-fusión xixonés carauterizáu pola so orixinal puesta n’escena.


La entrada pa esta folixa tendrá un preciu únicu de 10 € tando la diferencia en que a quien la merque anticipada se-y regalará el CD d’Insershow qu’editó’l FUSOA l’añu pasáu. El bonu anticipáu podrá mercase en dellos llocales de Xixón, Avilés, Candás y La Pola L.lena.

Solidaridá colos 14

Esta nueva edición de la “Folixa del Primeru Mayu” tendrá un cálter solidariu colos 14 de Cangues. Asina ye como los beneficios se donarán a los imputaos por participar nun actu antirracista el pasáu 2005 en Cangues d’Onís y que, tres la resolución xudicial que los absolvió de les penes de cárcel, enfréntense a multes d’entre 150 y 400 € por persona.