Inter la 1a de aprilo kaj la 30a de junio 2011 okazos en Pollando la Tutnacia Popolnombrado. Partopreno en ĝi estas deviga por ĉiuj loĝantoj kaj ĝi celas laŭeble plej precize prezenti la loĝantaron kaj la loĝejaron en nia lando.

La antaŭa popolnombrado okazis en 2002 kaj ĝia rezulto estis multe kritikata, inter alie pro tio, ke ĉe la demando pri nacieco eblis elekti nur unu respondon. Tio evidente diskriminaciis ĉiujn
minoritatanojn, kiuj ofte sentas sin dunaciaj - kaj tio estis ŝanĝita por la ĉi-jara kalkulado.

Alia grava ŝanĝo estas deklaro pri la lingvo uzata hejme. Ankaŭ ĉi-kampe la respontantoj povos elekti du respondojn. La enketistoj havos pretan liston, en kiu troviĝas la plej ofte uzataj naciaj
lingvoj, sed - atentu! - oni rajtos deklari ankaŭ ĉiujn aliajn lingvojn kiuj tie ne troviĝas. Kial ne utiligi la eblecon por deklari, ke hejme ni uzas Esperanton - kiel la ĉefan aŭ la duan lingvon? Estus valore, se printempe ĉi-jare ni respondus tiel, kaj la lingvo internacia troviĝus en oficiala statistiko pri la loĝantaro de Pollando. Mi forte insistas al tia ĉi deklaro kaj al informado pri la ebleco ĉe aliaj samideanoj.

Certe ke tiu ĉi nombrado estos pli "demokratia" ol la antaŭaj: oni rajtos deklari iun ajn kredon aŭ nekredon laŭ sia konscienco; eblos diri pri ne nur unu, sed du naciecoj; kaj kio gravas - nun oni ne devos elekti ununuran lingvon, kiu estos enkalkulita en la statistikon, sed iujn ajn du lingvojn, kiujn oni hejmuzas. Krom respondi al enketistoj vizitantaj la domojn, oni rajtos ankaŭ respondi telefone kaj mem-kalkuliĝi per la reto.

Mi deklaris min enketisto dum tiu popolnombrado kaj tre interesiĝas pri la rezulto, dume esperante je via aktiviĝo!