La francaj vizitantoj interesiĝis interalie pri la alterna profesia formado en maŝinindustria entrepreno, vizitis Altlernejon pri Artoj en Zuriko kaj la Federacian Instituton pri Teknologio en Laŭzano (EPFL), kie 30% estas francaj studentoj. Li diris al siaj akompanantoj: "Notu kaj kopiu." Ĉu ĉi tiu diro estis serioza aŭ ŝerca, mi ne scias.

Alia punkto estis la kunlaboro de Svislando kun la franca fisko pri la francaj impostfraŭdantoj. Pri tio oni malkonkordis inter Parizo kaj Berno dum la lastaj kvin jaroj. Nuntempe (post la skandaloj de UBS kaj Credit Suisse en Usono kaj Swissleaks) estas pli facile havi informojn pri ĉi tiuj malhonestaj fraŭdantoj kaj en 2018 Svislando pretas por aŭtomata informado pri personoj havantaj bankkontojn. La franca fisko enkasigis 2 miliardojn da eŭroj en 2014 (kaj same grandan sumon oni atendas por 2015) dank' al la imposta reguligo de la malhonestuloj. Hollande deklaris: "Ĉi tiuj aferoj estas nun malantaŭ ni..." Efektive, ne plu ekzistos banka sekreto por eksterlandanoj. Tion postulis la socialista partio jam de jardekoj. La premo de Usono kaj Francio kaj interalie la ŝtelo de informoj fare de la dungito Hervé Falciani ĉe la svisa filio de la brita banko HSBC poste ebligis la malkaŝojn de Swissleaks.

La komercaj rilatoj inter Francio kaj Svislando estas densaj. Ekzemple en 2014 Svislando estis la unua investanto en Francio per 3,5 miliardoj da svisaj frankoj. Francio estas la tria liveranto kaj la tria kliento de Svislando. Hollande multe interesiĝas pri investoj en Francio de svisaj firmaoj, kiuj dungas 140.000 francajn salajrulojn en Francio kaj 45.000 svisajn en francaj entreprenoj. Cetere pli ol 170.000 svisoj vivas en Francio respektive 150.000 francoj en Svislando (la plej granda franca komunumo en eksterlando mondskale).

Laŭ la oficialaj deklaroj la rilatoj inter Svislando kaj Francio estas "bonaj kaj amikaj", sed la svisa popola decido de la 9a de februaro ĉi-jare pri limigo de enmigrado maltrankviligas Parizon, ne nur ĉar 150.000 francaj pendolantoj laboras ĉiutage en Svislando, sed ankaŭ pro la EU-regulo pri libera cirkulado de personoj. La ambaŭflankaj kontraktoj inter EU kaj Svislando riskas esti rompitaj, se ne troviĝos interkonsento.

En franclingva Svislando, speciale en Ĝenevo, regas sento de kontraŭfranca sinteno kaj la movado kontraŭ pendolantoj (MCG) ekscitas tion. Ion similan oni apenaŭ trovas ekzemple en la "trilanda triangulo" en Bazelo kun limoj al Francio kaj Germanio. Lastatempaj decidoj de la franca registaro ne plaĉas al ĉiuj nek cislime nek translime. Temas ekzemple pri ĉesigo de la kontrakto pri impostoj koncerne heredaĵojn de svisoj kun posedaĵoj en Francio aŭ la devigo por pendolantoj loĝantaj en Francio kotizi al la franca sociala asekuro kaj al kromasekuro koncerne malsanon, dum multaj kotizis ĝis nun al svisa kromasekuro malpli kosta.

Svislando estas ĉampiono rilate esploron kaj kreskigon per 3% de la malneta enlanda produkto (16 miliardoj da frankoj laŭ "Global Innovation Index"). Du trionoj de ĉi tiu sumo devenas de la privata industrio. En Francio estas inverse: nur unu triono estas privataj investoj. Ĉi-jare Svislando prezidas la eŭropan programon Eŭreka (28 miliardoj investitaj en la jaroj 1985-2010), kiu subtenas projektojn de internacia kooperado por industria disvolvigo. Francio estas la dua partnero de Svislando kun cento da komunaj projektoj kiel ekzemple cerbesploro (Human Brain Project) kaj la konataj CERN-eksperimentoj pri fiziko.

En la svisaj altlernejoj studas 4000 junaj francoj. Laŭ francaj kategorioj la svisaj altlernejoj havas ekde la 1990-aj jaroj la rangon de "grandes écoles". La franca ambasadejo kalkulis 545 francajn profesorojn en universitatoj kaj 479 en specialigitaj altlerneoj. Pro politikaj kriterioj kaj la fakto, ke svisaj studentoj estas nur eta plimulto, la Svisa Federacia Instituto pri Teknologio Laŭzano (EPFL) altigis la enirkriteriojn por francaj studentoj rilate la postulitan bakalaŭron: de 12 sur 20 poentoj antaŭ kelkaj jaroj ĝi altiĝis al 16 sur 20 (mencio "tre bona"). La studentoj ĝenerale ŝatas la etoson de studado en kontakto kun avangardaj entreprenoj.

Oficialaj raportoj en la angla, franca, germana kaj itala.