Gepatro kaj gefilo diskutas pri genro

Jes, vi bone legis: „gepatro kaj gefilo“. Se vi perpleksiĝas, konsultu PIV-on kaj sub la kapvorto patro vi trovos: gepatro = patro aŭ patrino; gepatroj = patro kaj patrino. Bedaŭrinde pri gefilo PIV mutas, sed vi povas sen hezito konkludi analoge. Sekso kaj krimo estas la plej populara rubriko en la amasmedioj, do proponu en grupo diskuton pri la gramatika sekso, nomata genro, kaj vi ricevos lavangon da reagoj. Vi sendube scias ke „ge-“ estas prefikso kun la signifo „el ambaŭ seksoj“ aplikata al estaĵoj de du aŭ pluraj individuoj. Kiuj do diskutas pri genro? Gepatro kaj gefilo, do patro kun filo aŭ filino aŭ patrino kun filo aŭ filino, rilato individua de po du personoj, diskuto inter kvar okuloj kaj tre svaga pri la konsisto de la partoprenantoj, kvazaŭ en absoluta, ĝenerala senco, fine tre resuma. Certe vi ne ŝatus la skribmanieron patr(in)o kaj fil(in)o, ĉar tion oni prononcus patrino kaj filino, do estus seksa diskriminacio, kiun vi nepre volas eviti. - Tamen ankaŭ eblas familia diskuto inter gepatroj kaj gefiloj, dum kiu kvar personoj aŭ pli samtempe interdiskutas.

Abrupte aperas antaŭ viaj okuloj la problemo de gelernejo. Vi rapide vidas ke ne temas pri lernejo kaj lernejino sed pri lernejo por knaboj kaj knabinoj. Iom pli malfacila estas la kazo de geja familio, aŭ mi devus diri gegeja familio, ĉar povas esti du patroj aŭ du patrinoj. Kaj pri la infanoj de tiu familio, ĉu ili ankaŭ estas gegejoj? Tion malaprobus la bela junulino, kiu estas instruisto (sen lipharoj). En tiu momento vi komencas dubi. Io ne funkcias normale. En tiu senelireja situacio antaŭ nerva krizo vi suspire suplikas: „Sankta Pirono Psiĉjo, helpu min!“ Kaj poste vi miros pri la amika konsilo el la transmondo de la patrono por bonlingvismo: „Ĉu vi legis mian libron La bona lingvo? Tie vi trovos respondon.“