Valida kialo por ŝanĝo de kriterio

Mi ne estas kontraŭ nudismo, sed mi konsentas, ke oni devas cedi sian propran starpunkton, kiam aliaj sin ĝenas. Via ŝanĝo de kriterio estas laŭdinda. En la propra hejmo oni povas vivi laŭ sia propra bonfarto, sed oni devas atenti, ke oni ne altrudas sian vivmanieron al aliaj. Mi alte estimas homojn, kiuj estas pretaj kaj kapablaj je tia ekkono.

Dankon kara

Pardonu min en la kazo ke mi miskomprenas...ĉu vi volas diri ke, ekzemple, ni povas peti al niaj arabaj amikinoj ke ili ne montru fotojn kun kaptuko ĉar tio povas kontraudiri la edukadon de niaj gefiloj?

Aparte. En interreto estas lavango de nudaj korpoj, retumantaj infanoj frue malfrue renkontos kelkajn el ili kaj al mi ne estas tute klare ke nia memcenzuro solvos la timon de la gepatroj.

Mi ne povas doni kontentigan solvon sed mia premiso estas ke infanoj estas infanoj sed ne idiotoj*.
Ĝis certa aĝo, peniso au vagino vekas neniun apartan intereson ĉe infanoj. Kiam ili komencas sindemandi pri la afero mi supozas ke ankau ilia cerbo progresis por kompreni eksplikojn de la gepatroj.

*(Atentu ke "idioto" estas iom falsa amiko por hispanparolantoj)

La demando estas komplike respondebla, ĉar la medio de Interreto estas tro diversa por kontentigi ĉiujn moralojn. Mi baziĝas por mia decido sur la peto de miaj personaj geamikoj. Eble aliaj petus ke mi montru pli de mi aŭ eĉ malpli, sed mi ne povas strebi kontentigi ĉiujn. Same, ĉar mi estas nudisto, mi ŝatus ke ĉiuj miaj konatuloj sentime montru sin nudaj, por doni senton pri normaleco al mia filino, mi povus tion peti, sed mi scias, kiu estos la respondo ;-).
Kompreneble, vi povas peti al viaj arabaj amikinoj ke ili ne montru fotojn kun kaptuko, sed same ili povas peti al la hispanaj amikinoj, ke ili surmetu kaptukon por ne misinflui la edukadon de iliaj propraj filinoj. Kiel solvi la problemon? Mi supozas, ke estas afero de tempo, kaj ke homoj iom post iom alkutimiĝos al la ideo, ke homoj estas diversaj, kaj ke oni devas toleri la personajn decidojn, ĉu homo volas surmeti kaptukon aŭ montri sin nuda.
La realo estas ke, en nia nuna socio, plejmulto de la infanoj ne kutimas trafi nudajn korpojn en sia ĉiutaga vivo, kaj mi komprenas la preferon de la gepatroj, ke la infanoj havigu al si opinion pri tio kiam ili kapablos, same kiel mi preferas persone klarigi al mia filinoj kial estas homoj kiuj portas kaptukon, kiam alvenos la momento, anstataŭ ke la medio altrudu al ili misan komprenon pri la afero.
Temas pri afero de respekto. Vi povas peti al viaj amikinoj demeti la kaptukon. Alia afero estus, ke vi sentus vin rajtigita postuli tion el ili. Alimaniere dirite, kion mi kontraŭas, estas ke homoj sentu sin rajtigitaj devigi min aperi vestita. Se homoj donas al mi bonan kialon, por ne aperi nuda en Ipernity, mi havas neniun problemon por kontentigi. Tiel estis.
Evidente, infanoj retumantaj ne povas ne trovi nudajn korpojn en Interreto, sed temas ĝuste pri geinfanoj, kiuj ofte vizitas mian paĝo pro la esperantaj materialoj, kiujn mi metas en ĝi. Pro tio, ne estas por mi problemo komplezi la peton.

Aha. Komprenite. Ĉiukaze mi ĝojas ke la temo estis debatita kaj tio jam estas pozitiva paŝo.

Kvankam mi iam estis nudistino, mi tamen eksentis unun solan kialon por pripensigi Vin, kara Pedro... Mi iomete maltrankviliĝis pri mia filineto, kiu estas Ipernity membrino kaj pri ĉiuj infanoj... Mi pensis eble skribi al vi afablan letereton, sed ne estis certa en mia konsidero lige la problemo. Mi ĝojas pri via kapablo aŭskulti, aŭdi kaj kompreni...

Mia dekjara filo, Mikel, de antaŭ kelkaj monatoj scivolis pri nudismaj plaĝoj. Mi ne estis certa kun kiu celo li volis ilin viziti sed, ĉi somere, sub invito de mia frato kaj geamikoj, mi iris kun li al unu el tiaj plaĝoj. Mikel tute spontane sekvis nian senvestiĝon kaj tutnudiĝis, kvankam apud ni sunumiĝis kelkaj infanoj en bankalsonoj. Mi estis iom surprizita ĉar ja temis pri lia unua publika nudiĝo kaj li trovis tion eĉ amuza.
Tiu anekdoto ne kontraŭas viajn konsiderojn pri prudento ĉar ĉiu infano estas aparta mondo kaj edukiĝis en malsama etoso sed eble la debato povas instigi gepatrojn pli esplori la interesojn kaj akceptemojn de siaj filoj.

La plej lasta penso de Karulo estas vere inda atenton.

Mi memoras ke en la Kenja urbo Malindi, kun tre belaj plaĝoj ĉe Hinda Oceano, en la okdekaj jaroj (mi ne estis tie ek de tiam) la provincestro per oficiala ordono malpermesis al turistinoj bani sen mamujoj, por "respekti la lokajn kutimojn kaj moralon" en tiu precipe islama kaj pagana socio. Samtempe, en la busa stacio en plej dense vizitata centro de tiu sama urbo, inter amaso da homoj, lokaj virinoj tute senĝene iradis en tradiciaj vestaĵoj kun nude kaj libere pendantaj mamoj, vekante nenies atenton per tio. Sed tia nudeco ja malpli videblas ĉe nigruloj ol ĉe blankuloj, do mi konstatis ke tiu oficiala ordono fakte estis "rasisma" (kvankam ni nuntempe scias ke el scienca vidpunkto nigruloj kaj blankuloj apartenas al sama raso, homo sapiens sapiens).

Pri via fotocenzuro mi cetere ne havas memstaran opinion. Sed mi bedaŭras ke ankaŭ mian landon en la lastaj jaroj atakas prudo. Ekzemple, nuntempe malofte virinoj kaj viruĉoj saŭnas kune, krom en plej norda parto de Svedajo. Kaj en komunuma banejo oni foje vidas homojn saŭni en bankostumo, kio ja estas aĉe malhigienia maniero.

Kaj ĝis ĉi tiam mi eĉ ne menciis islam(anin)ajn vest- kaj bankutimojn, kies graveco kaj influo bedaŭrinde kreskas ĉe ni.

Vestaĵoj estas bonaj, precipe se malvarmas, sed oni ne troigu. Nuda korpo estas malabomena.

Tio, kion vi rakontas pri Kenio (cetere, la "loka kutimo" estas nenio alia ol la altrudo de la viktorianaj koloniistoj en la XIX jarcento), memorigas al mi sufiĉe rasisman "spritaĵon", kiun mi aŭdis antaŭ multaj jaroj (estu klare, mi abomentas iun anj esprimon de rasismo, sed la interesa ideo estas, ke tiu spritaĵo ĝuste speguligas la okcidentan cinikan rasisman moralaĉon rilate nudecon:
"Kiu estas la diferenco inter foto de nuda blankulino kaj nuda negrulino? La unua publikiĝas en "Play Boy", la dua en "National Geografic"...