La Zurenborgdistrikto en Antverpeno

Zurenborg estas la nomo de distrikto, kiu konsistas el kelkaj stratoj en la Antverpena antaŭurbo de Berchem. La distrikto troviĝas apud la fervoja stacidomo de Antwerpen-Berchem. Tio, kion vi povas vidi ĉi tie, estas absolute unika en Belgio, aŭ eble en Eŭropo. Nekredebla miksaĵo de arkitekturaj stiloj malfaldas sin antaŭ la okulojn de la vizitanto. Nenie alia tia panoramo de novstiloj povas esti admirata (aŭ primokata, laŭ iuj). La distrikto ne vere estas tre granda, tial la plej bona metodo por viziti ĝin estas promeni tra la diversaj stratoj. La distrikto ankaŭ estas fojfoje nomata la 'COGELS-OSY-regiono', pro la nomo de ĝia ĉefa strato.

La amaso de arkitekturaj stiloj kaj ornamaĵoj estas miriga. Oni povas trovi domon en novgotika stilo tuj apud domo en Art Nouveau stilo (aŭ JUGENDSTIL). Ĉiuj domoj estis konstruataj tiutempe, kiam ĉie en Belgio la novstiloj estis tre popularaj (novklasikismo, novgotiko, novrenesanco, ktp...). Ĝi iel montris, ke Belgio (kiel relative nova ŝtato) retrovis sian antikvan gloron de la 15a kaj 16a jarcentoj, kiam Flandrio estis unu el la plej gravaj Eŭropaj komercaj centroj. Unu stilo, tamen, estis nova: la ART NOUVEAU stilo. Ĉi tiu stilo estis evoluigita el la gotika kaj antaŭ-Rafaela stiloj. En Belgio ĝi estis perfektigata de la arkitekto Viktorio Horta. Tamen Viktorio Horta kreis tute novan domokoncepton, same interne kiel ekstere. La ornamaĵoj en la Zurenborg-distrikto en Antverpeno estis sole tie por imponi la preterpasantojn. La interno de la domoj en Zurenborg estas tre ofte tute tradicia kaj eĉ postrestinta.

Ĉi tial la Zurenborg-distrikto ĉiam dividis la opinion de la kritikantoj: valora aŭ malmodesta? En la 1950aj kaj 1960aj la tuta loko estis konsiderata eksmoda kaj estis tial ofte mokita. Multaj domoj riskis malkonstruon. En la 1970aj ŝanĝo fariĝis. La kolekto de novstiloj estis denove pli ŝatata kaj vidata kiel ĝi vere estis: perfekta ekzemplo de la pensmaniero kaj gusto de ia epoko, en ĉi tiu okazo la fino de la 19a jarcento.

Pliajn fotojn vi trovos en la bildoprezento pri Zurenborg.