Kio estas virusa kampanjo? Nu, mi ne precize scias, sed temas pri kampanjo kie la rekta objekto de atentigo estas kaŝita kaj/aŭ kvazaŭ-paradokse mispropagandita. Do, plu legi por kompreni pri kio temas tiu ĉi konkreta kampanjo.

Du geparoj da kateĥizecaj junuloj, sub la nomo "Happiness" ("feliĉo", en la angla) kantas laŭdon al antaŭnupta virgeco. Tio estas ŝajne kampanjo pledanta prudecon fare de kristanaj fundamentistoj, batalantaj kontraŭ "korupto" de idealoj en junularo.

Sed la realo estas tute alia. Tiu muzikvideo estas elpensaĵo de hispana branĉo de la fama satelita televido MTV, kiu tiel, malrekte mokas la skoldadon regule ricevitan de la ĉiamaj "gardantoj de la moralo".

La video estas la kerno de la tuta trompo-kampanjo, kiun gvidas iaspeca asocio (suspektinde falsa) "Nova renaskiĝo".

La kampanjo, sed ĉefe la filmo, estas neatendite sukcesa en Hispanujo. La filmo, ĝia etoso, la kostumoj de la kantistoj, la teksto... ĉio estas tiel mucide "kiĉa", naŭze sukereca kaj bigote naivaĉa, ke unuavide ĝi agacas; sed kiam oni komprenas ke temas pri inteligenta mokado, ĝi pelas al senbrida ridado.

Mi invitas ĝin spekti kaj kompreni ĉar mi tradukis, subtekstigis la filmeton en esperanton kaj alŝutis en mian retspacon. Tiu ĉi estas la dua fojo, kiun mi prezentas ĝin. Antaŭe mi alŝutis al YouTube sub la kaŝnomo "azenbugranto" sed la filmo malaperis. Mi aŭdis ke la kanto estis terure sukcesa dum la brazila e-kongreso de 2006!

Do, ĉu vi pretas ridi? Ek!