Kara...la batado de mia koro rapidiĝas kun la pasado de la tagoj... kial? Mi ĉeestos mian unuan U.K-on en Roterdamo! Jam alproksimiĝas la dato de mia vojaĝo Eŭropen!

En tiu pasinta semajno, mi preskaŭ ne sukcesis sidiĝi trankvile kaj zorgi pri nia radio-elsendo kun la atento, kiun ĝi meritas...troa laborado rilate al pasporto, sano-sekuro por la vojaĝo, k.s. farendaĵoj. Pro tio, mi ne sukcesis skribi tiun varbigilon por nia lasta elsendo akurate (sabate) sed, fine, jen ĝi:
 
- Mi dankas al la forto de interreto kaj ja al Ipernity la tagon, kiam Jianping Zhao alproksimiĝis de mi! De multaj jaroj mi estas fanino pri liaj voĉo kaj Esperanto-prononco kaj en tiu nia lasta programo, vi gajnos de li la legadon de iu tre bela teksto de Rui Barbosa – fama advokato, ĵurnalisto, ktp, de mia lando – kiu spektis la flugadon de la hirundoj en la urbo Campinas (Kampinas), ŝtato San-Paulo, en la komenco de la jaroj 1900. Rui neniam verkis poezion sed vi tuj rimarkas tiun senton poezia en pluraj el liaj verkoj kaj skribitaĵoj. Li estis vere impresiga homo! Pri li ni parolos iom pli en nia proksima elsendo, de la 5-a de julio. Tuj vi komencos aŭdi nian lastan elsendon, vi rimarkos, ke Jianping Zhao meritas iom plie niajn brakumojn kaj kisojn ! Jes! Li datrevenas lunde, la 30-an de junio! Kaj li lasis en nia programo bonegan donacon, kiu estas la legado de la Hirundoj de Campinas ! Li datrevenas kaj ni gajnas la donacon! ;-)  La tradukinto, la fama “ministro pri kulturo de Esperanto” (titolo ricevita de la brazilaj kleruloj.  Neoficiala, kompreneble) Floriano Pessoa de du jaroj prezentis tiun tradukon kaj hieraŭ li aŭdis kun mi la elsendon kaj petis al mi gratuli Jianping pro la legado! Koran dankon, Jianping Zhao! Vi estas tre bonvena ĉe nia radio-programo kaj ĉe ni - viaj novaj brazilaj amikoj! 
Lucas Yassumura, Emilio Cid kaj mi brakumas vin pro via datreveno! Estu feliĉa kaj sana! 
 
BONE, Ole Therkelsen revenas al nia programo por paroli iom plie pri la Kosmologio de Martinus . Ole estas tre afabla homo, kiu de kelkaj monatoj lasis al ni la rajton uzi siajn prelegojn pri Kosmologio. Nia radio-programo apogas ĉiujn religiojn, kiu uzas Esperanton en siaj internaciaj rilatoj kaj ni, kiel geekumeniuloj, ŝatas konatiĝi kun ĉies religiaj opinioj. Foje mi invitas aliajn religiajn sekvojn sed ne cxiam mi ricevas la amikan komprenon pri nia laboro. Tian amikecon mi ricevis de Miaohui pri Budhismo; de la skipo de Oomoto; de Ole Therkelsen; de la Spiritistoj (baldaŭ novaĵoj!). Dankon!
 
Mi tre ŝatas brokantaĵojn (rsrsrs) kaj pro tio, mi foje foliumas la klasikaĵojn de Esperanto. “La Unua Legolibro” de Dr-o Kabe estas unu el tiu verkoj. Kabe estis vera stilisto de Esperanto kaj multege kontribuis en la unuaj tempoj de la lingvo. Kelkfoje vi aŭdos partojn de tiu verko en PM. “Ĉu vi scias”? estas tre interesa kompilaĵo de Wilfrid Appleby kun 100 demandoj kaj respondoj pri ĝeneralaj aferoj pri nia lingvo. 
“Ĉinaj Fabloj” prezentas alian ĉapitron, ĉi-foje la povra patro ĉeestas  kun siaj filoj.
Fine, vi (re)konatiĝas kun la muziko de MERLIN ! Merlin havas grandan influon en mia vivo, ĉar ili ludis en la unua arta vespero, kiun mi provis en la verda vivo, en mia unua Esperanta Kongreso, en 2000, en mia urbo Petrópolis! Mi estis tiam ĵusbakita esperantisto kaj la vibrado, la energio de ĉiuj verduloj en tiu salono vere impresis min! Pro tio, mi sentas karesan rilaton al la muziko de Merlin! Kaj en tiu nia elsendo, mi invitas vin ĝui ĝin kun mi! Tre bone, se vi akceptos mian proponon tie... ! ;-D
 
Aŭdu nian programon tie ĉi : http://parolumondo.com . Vi estas ege bonvena ĉe ni! Ne forgesu lasi viajn komentojn kaj ĉefe sugestojn al ni: rede@radioboanova.com.br
 
Koran dankon pro via atento kaj akompano al nia laboro! Ĝi ja estas via, ĉar sem vi, ni parolas ĉion al nenies oreloj!
 
Brakumas kaj kisas vin, via radiparolistino Mirna Marino