Frazoj sen signifo!

Ĉu tiaj frazoj vere ekzistas?.

Noham Chomsky kreis la frazon "Colorless green ideas sleep furiously" (Senkoloraj verdaj ideoj dormas furioze.) en la jaro 1957 por montri la diferencon inter sintakso kaj semantiko. (angla lingve: http://en.wikipedia.org/wiki/Colorless_green_ideas_sleep_furiously

Vizitante la informpaĝon http://www.myspace.com/colorlessgreenideasbe ekĝermis ĉe mi la ideo, ke la frazo estas ero de poemo. Tiuj pensoj gvidis mian imagon al interpreto, kiu donis al la frazo semantikan signifon.

Unu ebla interpreto estas ke: "verdaj ideoj" = "sana medio sur la Tero" iĝas "senkoloraj" pro tio, ke homoj venenas ĉi tiun belan mondon. Tiujn ideojn oni "dormigis" (eble mortigis) kaj pro tio la ideoj estiĝis furiozaj dormantoj.

Jen unu el pluraj eblaj interpretoj de la frazo "Senkoloraj verdaj ideoj dormas furioze."

Al mi ŝajnas ke, je momento kiama oni legas ĉi tiun "frazo sen signifo", tio vekas la imagon ĉe la leganto, kiu furioze komencas serĉi la kaŝitan signifon. Stulte? Nu, jes, granda nombro da lingvistoj sen humuro aŭ imago probable opinios tion. ;-)

Chomsky prezentas duan version kun alia vortordo: "Furiously sleep ideas green colorless". Tradukita al Esperanto, "Furioze dormas ideoj verdaj senkoloraj ", la poema karaktero de la sensignifa frazo iĝas pli evidenta. Per uzo de komoj oni povas substreki la poeman karakteron de la frazo: "Furioze dormas ideoj, verdaj, senkoloraj." Oni atentu, ke ne temas pri gramatikaj komoj sed pri komoj, kiuj indikas paŭzojn je legado.