Idala Podkasto 043

Descargalo aqui / Download here / Deskargez ol hike

Idala Podkasto numero 43

Agosto 2011

Hola, kara askoltanti! Yen itere me, Jose Cossio, e mea maxim recenta idala podkasto, brodkastita del Urbo dil Suno, Hermosillo, Sonora, Mexikia. Esante ja mea kustumo, me deziras lo maxim bona por vi, kar amiki.

La temi quin me adportas a vi esas:

-La maxim granda plantacerio de marihuano en Mexikia.

-Dekesisyara astronomiistino en la Urbo dil Suno.

-Siesto plubonigas nia rendimento.

*********************

Meze la monato Julio, en la stato Baja California, Mexikia, on trovis la maxim granda plantacerio de marihuano en la historio di ca lando. en la municipo Ensenada. Dum la operaco arestesis dek e sis personi.

La plantacerio konsideresas esar plu granda til 90% kam la trovita dum la yaro 1984 en la stato Chihuahua, la legendala *rancho Bufalo. La dimensioni dil plantacerio esis 120 hektari, to es, areo til mil metri larja e mil e duacent metri longa. Ol kovresis quale teplico per treliso ek plastika stofo por protektar la planti di marihuano kontre nivado e por konservar la humideso necesa por olia kreskado.

L'autoritatozi kalkulas ke la plantacerio povus produktir cent e duadek tuni de marihuano, qua equivalas plu kam sisadek milioni de dozi, di qua la valoro esus 160 milioni de Usana dolari en la merkato dil drogi. Un del militista chefi qua partoprenis en l'operaco kontre la narkotrafiko manifestis ke kande li arivis esis cirkume sisadek personi laboranta en la loko, ma kande ici vidis l'armeani fugis del plantacerio e la soldati nur povis arestar dek e sis laboristi.

Depos la deskovrajo, l'autoritatozi inspektis la loko. Ibe esis precipue planti cent e kinadek centimetri longa, e segun on kredis, la plantacerio esis pronta rekoltesor ye duadek e kin dii. Pri la lojeyi ed altra instaluri trovita, on trovis chambrego qua funcionis quale manjeyo por la laboristi, kun olua propra koqueyo. Anke on trovis granda dormeyo por omna laboristi. Nur un del lojeyi remarkesis inter la ceteri pro olua relativa luxo, olta qua esis, probable, dil chefo, qua ne arestesis.

Quankam la agro di kultivado es dezertala, semble la laboristi qui esis ibe konocis quale kultivar la plantacerio per bona tekniki e per bongrada fertiligili kemiala por ta tereno. Anke la plantacerio posedis olua propra aquosistemo por spricar la planti.

Segun manifestis un del armeani partopreninti dum la deskovrajo, esis la prezenteso di du armizita viri to quo direktis li aden la plantacerio tra voyacho en la dezerto. Kande l'armeani arivis al loko ne eventis ula problemo, nek mem nura pafo.

Nun, dek e sis personi arestita dum l'operaco mustos subisar proceso avan kontoro dil Prokuratoro dil Republiko e l'armeani havos multa dii de laboro por destruktar la plantacerio, en qua esus posibla konstruktar plu kam nonamil domi.

*********************

Elu nomesas Itzel Alania Lopez Lopez, Hermosillana yunino qua evas dek e sis yari, ma ye ta evo el montras elua habileso por kaptar imaji dil universo. L'imaji di kolda zono, makuli ed altra protuberanci dil Suno partigesis en reto di Suno-studianti en la urbo Tucson, Arizona, Usa. La yunino lernas la triesma semestro di mezaltanivela kolegio en la Urbo dil Suno, Hermosillo.

"Me obtenis la fotografuri per diversa kameri quale He Alfa ye la 4esma di Julio e lo interesanta di mea imaji es ke oli montras sunala makuli e filamenti", explikis Itzel. "La fotografuri obtenesis dum lapso inter la dek e tri e la dek e kin kloki, olqua es la tempo quan me pasas hike", agregis la yunino.

El asistas omnadie al Areo pri Astronomio di l'Universitato di Sonora por surveyar l'aktiveso dil Suno e konocar pluso pri un de elua maxim prizata aferi, l'Universo. La pasiono di Itzel pri l'Universo venas de kande el esis mikra puerino, ma til poka tempo ante nun el havis la chanco lernar ed esar kune specalisti pri Astronomio.

"Me atencas multe omno relatanta l'Universo e lua misterii, me prizas la steli", dicis Itzel, olqua mencionis ke el volus studior Astronomio e probable dedikar su pri l'inquestado di steli. "Me volus divenar Astronomiisto, ma to es ulo quan me ne pensabas tre bone. Me interesesas pri surveyar steli kom la Suno", klarigis el.

Ultre asistar al observeyo pri astronomio dil Universitato, Itzel partoprenas en la klubo pri la sama feldo en elua kolegio ube el lernas kune altra admirinda studenti pri quale uzar teleskopi, mezurili dil spaco e pri la kompozo dil Universo. Quankam to ne es elua intenco, certe Itzel es exemplo sequinda dal Mexikiana e mondala yunaro qua amas la cienco e l'Universo.
*********************

Siesto ne esas sinonimo di repozo e laxeso. Diversa ciencala studii demonstras ke ca praktiko proporcionas plura benefici por ti qui profitas poka tempo dum la dio por klozar l'okuli e dormar.

Segun recenta informo di la Nacionala Administrerio pri Spaco ed Aeronautiko, NASA, la *optima tempo por havar siesto esas duadek e sis minuti. Segun ta organizuro, la dormo qua durus to helpus la kontroleri dil aeroportui plubonigar lia rendimento til 30% e plufortigus lia alertemeso til 54%.

Altra del benefici es ke la siesto helpas la korpo suportar plu bone la dio. Anke lo favoras la digestado, nam la siesto permisas muskulala laxigado qua faciligas al digestosistemo efektigar ca procedo plu efikive.

E se ica praktiko es beneficoza, por l'infanti e la oldi olta es fundamentala. Por l'infanti minora kam kin yari es necesa por lia fizikala e neurologiala developo. E por l'evoza personi la siesto permisas havar plusa rezistemeso por suportar la jorno e samtempe havar plu bona vivqualeso.

Es mencioninda ke l'experti avertas ke misuzar la siesto e dormar plu kam lo rekomendita povas alterar la dormocikli e co povus produktar insomnio dum la nokto.

******************

Jose Cossio adias vi til la sequanta idala podkasto. Danko pro via atenco e til balde.

-------------------------------------------------------------
Muziko

Seismic Anomaly - Just don't give a damn.

Lenta versiono: