Mi tion feliĉe ne devis fari, sed en multaj landoj iri al lernejo ne estas evidenta afero.

Ofte la familiaj aŭ financaj situacioj estas tiaj ke la infanoj simple ne povas iri al la lernejo. Eĉ ne al al ŝtata, kiu kostas multe malpli ol la privata ernejo. Ĉar tamen necesas havi monon por ekzemple la uniformoj. Infanoj kiuj ne portas la lernejan uniformon ofte ne rajtas studi en la lernejo.

Jes, bone, sed kion vi povas fari?

Mi havas sugeston.  La tanzania organizaĵo Mazingira provas kolekti monon por tiuj infanoj kiuj ne povas iri al lernejo. Ili uzas la monon por uniformo kaj aliaj lernejaj utilaĵoj. Jam dekoj da infanoj trovis subtenanton. Ĉu ankaŭ vi iĝu subtenanto? 

Sed ne nur tio: Mazingira ankaŭ volas starigi mezlernejon, ĉar en tiu regiono de Tanzanio, en Bunda, ne estas sufiĉe da mezlernejoj, kaj ankaŭ pro tio ne ĉiuj povas plustudi post la bazlernejo.

Aldone, por ke la kaŭzoj de la malriĉeco iom post iom foriru, Mazingira komencis mikrokreditan projekton, en kiu virinoj ricevas malmultekostan prunteprenon, per kiu ili povas komenci malgrandan komercon. Jam 90 virinoj ricevis prunteprenon, dank' al subtenantoj en Eŭropo. La repagita mono estas uzata por denove pruntedoni al aliaj virinoj.

Ĉar ankaŭ mankas akvoputoj, kaj ĉar pro tio la virinoj ĉiutage perdas horojn por ĉerpi akvon el foraj putoj, ankaŭ la konstruo de pliaj putoj estas celo de Mazingira. Putoj kostas tre multe, kaj ankoraŭ eĉ por unu puto ne kolektiĝis sufiĉe da mono! Tamen, jam parto estas kolektita, kaj se vi aldonas iom, ni sukcesos. La unua puto estos starigita sur la tereno de la konstruota mezlernejo.

Mi esperas ke mi igis vin sufiĉe scivolaj por almenaŭ rigardi la retejon de Mazingira.

Vi rimarkos ke la viro malantaŭ Mazingira estas konata tanzania esperantisto... pro tio li ankaŭ deziras instrui Esperanton en la nova lernejo.

Mi deziras al vi bonajn festojn, belajn pensojn, kaj altruismajn agojn.

Heidi