↑Tilio's blog

 

 

 

              Tri knabinetoj, (unu de ili estis mia filino Vita),

 

ludis ofte en infanĝardeno sekvan ludon :

 

     Unu pendis sur tenilo de baskulo (plej ofte ĵus Vita), kaj

 

du aliaj staris flanken – dekstre kaj maldekstre. Dekstra

 

estis buĉisto(viandovendisto), kaj maldekstra kliento –

 

aĉetanto.

 

   «Bonan tagon, buĉisto!»

 

   «Bonan tagon, sinjoro kliento! Kion vi deziras?»

 

   «Ĉu viando estas freŝa che vi?»

 

    «Kompreneble! Vidu ja ĝin, kiel freŝa, ankoraŭ

 

vivanta!»

                                                  - vendisto tiklas «viandon»

 

kiu ridas kaj skuiĝas.

 

    «Bone, donu al mi pecon da femuro.»

 

     «Tuj mi tranĉos..»

                           

   Vendisto prenas «tranĉilon» - iun branĉeton de pino kaj intencas «fortranĉi» pecon de femuro.

 

    En tiu momento «viando» saltas de stango kaj fuĝas.

 

     Vendisto kaj aĉetanto postkuras ĝin, sed vane – viando sin kaŝas en arbuto.

 

……………………………………………………………………

 

     Originala ludo, senriproĉe.

 

  Kaj iel metafora.

 

  Ofte oni vidas inan personon, aparte se temas pri bona peco, kiel simpla karno.

 

  Multaj predatoroj postkuras ŝin, kio estas sento plaĉa – kial ne?

  

   Ĝis nun, ŝi ĉiam sukcesis «fuĝi en arbuto». 20 jara knabino.

 

   Iam povas okazi ke ŝi decidos ne fuĝi al arbuto, sed iri kun «aĉetanto» hejme.

 

   Tiu momento iomete timigas min.

 

   Jes, jes – mi ne rajtas – kompreneble.

 

   Tamen – mi mamnutris ŝin.

 

   Plenan jaron.

 

   Mi ŝanĝis vindtukojn…kaj ĉiuj aliaj ĉarmaj devoj ĉirkaŭ infano (brrrr!).

 

   Nun mi ne volas ke iu prenu ŝin hejme kiel pecon da viando.

 

   Kaj …… (kion oni faras kun viando? Mi forgesis – certan tempon mi estas vegeterano.)

 

Aŭ pli terure – (ol baki, friti, rosti, farĉi…) – katenigas ŝin.

 

Inter kvar muroj.

 

En kuirejo.

 

               (Ŝi ne scipovas kuiri, hehe!- Aĉetanto suferu!)

 

Uzu ŝian korpon por memproduktado.

 

                                          (Damna kuniklo!)

 

 Poste por mamnutri kuniklidojn, ŝanĝi vindtukojn….

 

      ….kaj ĉiuj aliaj ĉarmaj devoj ĉirkaŭ inf…kuniklidoj (brrrr!).

 

…………………………………………

 

 

  Fuĝu, knabino, al arbuto, fuĝu rapide!

………………………………………….

 

 

 

Ne hastas aviniĝi:

 

                                  Tilio

 

 

La 13a signo horoskopa

………………………………

 

Kion ŝi aŭdacis – neimageble!

 

Klare, mi parolas pri mia filino 20 jara.

 

Kiu aŭdacis enkonduki al mi CENZURON de temoj priparoleblaj.

 

 Do, mi ne plu rajtas paroli pri tri (3) sekvaj kampoj:

 

1. «GLOBALA»

                        

                         En temo «GLOBALA» apartenas ĉiuj miaj ŝatataj

 

-         kataklizmoj,

-         ekologiaj incidentoj,

-         poluigo de akvo,

-         aero,

-         malapero baldaŭa de nafto,

-         malsato monda kiu minacas globale,

-         suferoj,

-         ranoj,

-         malsanoj,

-         akridoj,

-         epidemioj….

-         nenio simila al biblia «Apokalipso».

-         …………………

                          Severe malpermesita!!! (Preskaŭ punenda)

 

1. «KONTRAŬGEEDZA»

 

                  Tio signifas ke mi ne plu rajtas kraĉi sur geedzeco kiel institucio.

 

Ekzemple, mi ne rajtas kompari  rilaton inter viro kaj ino kun maĉgomo kiu rapide perdas dolĉan guston.

 

Ŝi ne volas plu aŭskulti tion!

 

Ankaŭ ŝi ne volas aŭskulti  ion kontraŭ bebaĉoj – kreaĵoj kriantaj.

 

 Ŝi volas kredi ke ili estas amindaj.

 

              Ŝi ne volas aŭskulti ke homo estas laŭ naturo poligama estaĵo,

 

 ke ĉiu edzo perfidas edzinon, almenaŭ en fantazio.

 

              Se iu hundo maskla saltas sur ŝia hundino kun emo kopuli, mi ne rajtas komenti:

 

    «Jen vira naturo!»

             Ŝi ne volas aŭskulti, kaj punktofino.

 

Ŝi preferas kredi je romantiko rozkolora- siropeca kaj feliĉa fino de longdaŭra kunvivo.

 

     Kvankam neniun geparon tian ni konas.

 

 

 

1. «HERETIKAĴOJ»

 

                    Al tiu ĉi kampo apartenas miaj ŝatataj asertoj kiuj malpruvas ekziston de dio

 

 («Kial li ne montras sin, se li volas esti adorata?»)

 

 kaj ĉiuj ideoj pri lia krueleco, se li ekzistus.

       

  Ne tro, sed tamen ŝi timetas de blankharara barbulo sidanta sur nuboj.

 

  Ŝi malpermesas tion «por mia bonfarto».

 

 Ĉar povas okazi ke iam mi bezoson dian manon.

 

Por savi min el la ….(ĉu sesa, sepa, oka?) rondo de infero.

 

 Tial mi ne rajtas esprimi heretikaĵojn aŭ blasfemojn, almenaŭ en ŝia ĉeesto.

 

Sakri mi rajtas.

 

 (Aparte se tio donas al mi mondan famon, kiel pasintjare, hoho.)

 

………………………………………………………..

 

 

  Kaj NUR tio estas malpermesata, nenio alia.

 

  Do mi rajtas tutelibere:

 

-         priskribi detalojn de operacioj,

 

-          diskuti pri enhavo de kolono ( pli aŭ malpli science),

 

 

-         paroli pri diversaj trafikaj akcidentoj kun…hm…malagrablaj sekvoj,

 

-         rakonti XXX filmojn,

 

 

-         doni proponojn pri senlimaj kruelaĵoj – ĉio en ordo.

 

      Tamen, ekde regularo pri cenzuritaj temoj estas enkondukita – ni silentas. Multe pli ol

 

normale.

 

 

    Mi pricerbumis la aferon, kaj jen la konkludo:

 

   Ŝi naskiĝis inter vintro kaj printempo, ĵus sur limo.

 

   Verŝajne ŝi estas en la 13a signo horoskopa.

 

   Tiu konstelacio nomiĝas STRUTO.

 

    Ĉefa karakterizo -

                                   kapon ĝi tenas profunde en sablo.

 

…………………………………………………………………………..

 

 El realeco de

 

                        Tilio