dew's blog

la aŭtuno (re)venis kaj kun tio finiĝis la ferioj de "hotel desperado". ni koncertis pasintvendrede kune kun la flamenco grupo "sin zapatos" en la klubo "opera" en christiania. por tiuj el vi kiuj maltrafis la koncerton, jen tri kantoj: ;-)

la unua kanto estas de nia sonprovo:

ĉe la dua kanto gastas vilads, la filo de kim, kiel homa beat box:

la lasta estas nova kanto de thierry kaj kim (kaj nur ili du ludas):

bonan aŭskultadon!

kelkaj el vi verŝajne konas la ukrainian popolkanton "marusia" de la albumo "jomo slavumas" (eldonita de vinilkosmo 2006). kiam mi loĝis en rusio kaj esploradis pri rusa rok-muziko mi ludis la trumpeton en la ska-punk grupo svoboda. unu el la kantoj kiun ni ludis kaj surbendigis 2005 estis fakte "marusia".mi pro tio iomete miris kiam mi poste aŭdis la version de jomo kiu estas sufiĉe simila al la nia - sed nia versio estas kun blovsekcio, en ska-punk ritmo kaj nia kantisto kantas ĝin en la ukraina, ne esperanto. ;-)

vizitante berlino antaŭ kelkaj semajnoj mi vidis ke nia versio de "marusia" ĵus aperis sur la kompilaĵo "ukraine do amerika" farita de la russendisko dĵ-oj wladimir kaminer kaj yuriy gurzhy (vi povas vidi la anoncon en la germana ĉi-tie: www.russendisko.de) - sufiĉe agrabla surprizo! por tiuj el vi, kiuj ne konas la russendisko, tio estas unu el la plej famaj noktaj eventoj en berlino hodiaŭ kie vi nur aŭdas muzikon el la antaŭa soviet unio. nepras viziti ĝin en kaffee burger (la evento okazas ĉiun duan sabaton).

Vendrede ni ludis ĉe la 25-jara jubileo de Støberiet, kultura domo en Kopenhago, kun premiero de la lasta versio de nia nova kanto de Mark, "Afro Funk Jam":

Jen kelkaj filmetoj de niaj koncertoj la 10an de majo. Matene ni ludis kiel la unua grupo ĉe la Karnevalo en Kopenhago. La unua filmeto estas "Ungdomshuset", nia kanto kontraŭ la detruo de la alternativa junularcentro "Ungdomshuset":

Sed ni ja ankaŭ kantas esperante - jen "Ska virino":

Vespere (pro tio ni ludis tiom frue ĉe la karnevalo) ni veturis al Hallingelille, alternativa vilaĝeto apud Ringsted, por ludi tie. Jen eta kompliaĵo de la vespero:

Majo iĝis sufĉie ludplena monato: Hotel Desperado ludis la 1an de majo, 2 foje la 10an - ĉe la Kopenhaga Karnevalo kaj en Ringsted, la 14an en la malliberejo "Vestre Fængsel" (ege interesa koncerto - ĉeestis ĉirkaŭ 50 malliberuloj kiuj ŝajne ege aprezis la muzikon) kaj venontvendrede ni ludos en Støberiet. Ni ankaŭ surbendigis la koncertojn ĉe la karnevalo kaj en la malliberejo kaj tri kantojn iris ipernity-en:

Kaj se vi volas aŭdi pli, tiam simple venu al KEF - ĉu vi jam aliĝis?

Ordigante mian komputilon mi (re)trovis la artikolon "Piratado kaj Sabotado de Esperanto-Muziko" kompilita de Floréal Martorell. Ĝi bone montras la problemojn de produktado de E-muziko kaj la realaj kostoj. Mi alŝutis la artikolon kaj ĝi nun kuŝas ĉe miaj dokumentoj se vi emas legi ĝin.

mi iomete pripensis kiel plej taŭge uzi mian ipernity-spacon. kiel ĉe multe aliaj mi jam havas kelkjan retajn hejmojn: mian personan retpaĝaron (www.d-ew.info), blogon (blog.d-ew.info) kaj tri foto-retejojn (du personajn: www.flickr.com/photos/david-emil, picasaweb.google.com/wickstroem kaj komunan kun fotoj de mia infano fotita de mia partnero kaj mi: picasaweb.google.com/ella.kozhevnikovawickstroem).

do, post iomete da cerbumado mi decidis uzi la spacon por la loka kopenhaga esperanto muzikgrupo "hotel desperado" en kiu mi ludas. ;-) kvamkam ni jam havas myspace paĝaron (www.myspace.com/hoteldesperado) ankaŭ bonas esti ĉi-tie. vi eble konas la grupon "esperanto desperado" - "hotel desperado" estas unu el la du grupoj kiuj fondiĝis post la disiĝo de "esperanto desperado". en ĝi ludas el la malnova "esperanto desperado" brian, mark, nis kaj kim. novaj membroj estas thierry kaj mi. mi jam aldonis tri kantojn kiujn ni surbendiĝis pasintseptembre en kopenhago. krome mi planas aldoni kantojn de niaj koncertoj (nu, almenaŭ tiuj, kiuj aŭskulteblas ;-)) kaj fotoj, sed tio daŭros ankoraŭ iomete. intertempe eblas spekti kelkaj filmetoj filmitaj ĉe la jarĉefkunveno de la dana politika partio "enhedslisten" (23.02.2008): ;-) 

mi malbenas militon

ska virino

ŝi estas for