Mariana Evlogieva's blog

Nia belulino Grimalkin estas la unua kato en Bulgario, kiu havas propran blogon.

Mi tradukas de la kata lingvo en la bulgaran. Mi emus aldoni ankaŭ E-version, sed mi ne scias ĉu estus legemuloj.

Ĵus mi trovis retan grupon groups.yahoo.com/group/verdakato/ kaj ŝajne sukcese aliĝis, sed mia mesaĝo al la listo ne aperis, nek mi vidas ian klarigon pri tio kial ĝi ne aperas.

Laŭ la retejo de UEA ankoraŭ ekzistas (sed ĉu ankoraŭ aktivas???)

Rondo Kato (Kat-amantoj / Esperantista Kat-amikaro).

Se iu havas aktualajn informojn pri aktivaj grupoj de kat-amatoj, bv. informi min!

Mia bulgarlingva blogo naskiĝis precize antaŭ unu jaro - je la fatala 13-a dato de marto, kiu en 2009 estis vendrede. La nomo ПЕТЪК 13 signifas en la bulgara VENDREDO 13.

La komenca ideo estis, ke ĉiuvendrede mi publikigi po 13 artikolojn je la 13-a horo. Poste mi rezignis pri tio, ĉar evidentiĝis, ke multaj homoj ne interretumas semajnfine. Do nuntempe mi nepre publikigas ion vendrede, sed ankaŭ alitage. Dume amasiĝis pli ol 13x13 artikoloj, kaj la blogo estas sufiĉe konata. Interalie pro/per ĝi mi iĝis gastiganto de la unua rentontiĝo de bulgaraj blogumantoj, kiuj verkas pri libroj.

Ĉirkaŭ triono de la artikoloj iel rilatas al Esperanto - plejparte per distraj tekstoj mi informas la neesperantistan publikon.

Antaŭ kelkaj monatoj ankaŭ nia katino Grimalkin ekhavis propran blogon. Dank' al Istvan Ertl Gri iĝis konata ankaŭ en EU-instancoj en Bruselo. :-) Provizore Grimalkin ne blogumas en Esperanto, sed estas ideo, ke ŝia blogo iĝu plurlingva.

Dankon al ĉiuj, kiuj aliĝis min al siaj retoj aŭ vizitis mian paĝon ĉe Ipernity.

Bedaŭrinde mi malofte aperas tie ĉi.

Pro manko da tempo mi devas elekti inter diversaj ŝatokupoj.

Do en la lastaj monatoj mi preferis paroli pri Esperanto al neesperantistoj pere de mia bulgarlingva blogo 13.interpres.org/.

Certaj sukcesoj jam estas - ekzemple, tagĵurnalo intervjuis min pri lingvoj kune kun nia kleriga ministro! Se vi komprenetas la bularan lingvon, bonvolu vidi tion: 13.interpres.org/barabar-az-s-mujete-vestnik-telegraf-za-esperanto/. Interalie, tie aperis la longega vorto mal-san-ul-in-ej-eg-estr-ar-an-in-instru-ej-pur-ig-ist-in-ar-sindikat-kun-ven-o - parte mi prunteprenis ĝin (mi ne memoras kie mi vidis ĝin, sed kore dankas al la inventinto!) kaj parte mi plilongigis ĝin per kelkaj pliaj elementoj.

En la rubriko Esperantissimo mi jam publikigis 16 artikolojn.

La vorto Esperanto estas ofta etikedo en la blogo.

Ĉiuj artikolojn mi klopodas diskonigi ankaŭ en sociaj retoj.

Do jen kial mi malofte skribas tie ĉi en Esperanto - ĉar mi skribas pri Esperanto. ;-)

Ne plu http://13.inter-pres.org, sed 13.interpres.org/ !!!

Se vi scipovetas la bulgaran, bonvolu viziti mian bulgarlingvan blogon:

http://13.interpres.org/

"Петък 13 - личен блогослов на Мариана Евлогиева"

Jen mia tria artikolo pri la ĵurnalista kongreso en Vilno, kiu aperis en n-ro 1/2009 de revuo "Bulgara Esperantisto". Pli bone malfrue, ol neniam, ĉu ne? ;-)

Esperantistoj ĵurnalistoj kongresis en Vilno

Preskaŭ 200 esperantistaj ĵurnalistoj el proksimume 40 landoj kongresis en Vilno. Por ke ne estu plendoj pri manko de ajna preciza cifero, mi almenaŭ diru la ĝustajn datojn - de la 26-a ĝis la 30-a de majo 2008. Jes, la datoj ne estas eraraj! Do ili demandigas kial tiu ĉi informo ne aperis pli frue en Bulgara Esperantisto. La kialo estas simpla - miskompreno. Ŝajne ĉiu el 4 la bulgaraj reprezentantoj kredis, ke iu alia raportos. Nome de miaj gekolegoj mi pardonpetas la organizantojn kaj la legantojn. Ĉar jam pasis kelkaj monatoj, mi ne povus prezenti al la legantaro novaĵon - tiuj kiuj interesiĝis, certe informiĝis de aliaj fontoj. Oni jam scias, ke:

- la organizantoj ĉekape kun LEA-prezidanto Povilas Jegorovas perfekte faris sian laboron;

- kolektiĝis ne nur profesiaj kaj amatoraj ĵurnalistoj, sed ankaŭ literaturistoj, eldonistoj, tradukistoj k.s.;

- la abundan programon kompletigis ekskursoj kaj akceptoj de litoviaj gravuloj;

- la ĉeftemon „Internacia interkultura komunikado: ĵurnalismo kaj Esperanto“ traktis pluraj altnivelaj prelegoj en kelkaj salonoj - inter ili estis prelego de nia samlandano L. Trifonĉovski;

- la partoprenantaro ne nur diligente aŭskultis, sed ankaŭ vigle diskutis sub la "reĝisorado" de prof. Humphrey Tonkin;

- en Vilno restariĝis la Tutmonda Esperantista Ĵurnalista Asocio, kies estrarano mi elektiĝis - certe dank' al la iama aktiveco de la bulgara TEĴA-sekcio.

- ktp... (Kiu bezonas konkretajn faktojn kaj detalojn, bonvolu viziti la oficialan retpaĝaron de la kongreso: Iom da klaĉoj kaj privatajn impresojn vi povas trovi en mia Esperanto-blogo, kie legeblas du pliaj artikoloj: ttp://www.ipernity.com/blog/amuze/94739 kaj ttp://www.ipernity.com/blog/amuze/99818.

Fine mi nur resumu mian ĉefan konkludon pri la Tutmonda Kongreso de Esperantistoj-Ĵurnalistoj: Sen troigo por mi mem ĝi estis la plej bona Esperanto-aranĝo dum la lasta jardeko. Certe, UK-ojn partoprenas dekoble pli da homoj, sed inter ili estas eble 100, kun kiuj mi deziras kaj sukcesas interrilati. La avantaĝo de la ĵurnalista kongreso estis, ke tiujn ĉi 100 personojn mi multe pli facile povis kontakti en Vilno. Mi bondeziras al Esperantujo pliajn similajn aranĝojn, en kiuj oni ne disputas pri la akuzativo, sed okupiĝas pri fakaj kaj socie gravaj temoj!

Mariana Evlogieva

Dankon al tiuj kiuj vizitadas mian blogon, kvankam ĝi apenaŭ viglas! Hodiaŭ mi deziras regali ilin per iom ekzotika frandaĵo - jen recenzo de mi, kiu aperis en n-ro 82 de revuo "Etnismo".

La aŭtoro, mem esperantisto, ĝojus vidi sian verkon ankaŭ en Esperanto. Se iu eldonisto interesiĝas, Gereon Janzing pretas prepari E-version!

Bonvolu rigardi mian unuan albumon ĉe:

http://www.ipernity.com/doc/amuze/album/89886

Ĝi enhavas kelkajn fotojn de kata bebo de ankoraŭ nekonata sekso kaj sen nomo, sed kun jam ĝissange konataj ungegoj kaj dentegoj. Jen vera amasmOrdisto!

Jen la dua parto de la artikolo pri Litovio, kiu aperis en revuo FREŜO, n-ro 41. Tiu ĉi numero aperis nur papere, sed aliajn numerojn kaj pliajn informojn pri la revuo vi povas trovi en la ipernity-spaco de la ĉefredaktoro Marian Zdankowski: http://www.ipernity.com/home/28086

Jen artikolo de mi, kiu aperis en revuo FREŜO, n-ro 39. Tiu ĉi numero aperis nur papere, sed aliajn numerojn kaj pliajn informojn pri la revuo vi povas trovi en la ipernity-spaco de la ĉefredaktoro Marian Zdankowski: http://www.ipernity.com/home/28086

Mi ĵus transloĝiĝis, kaj ankoraŭ ĉiuj miaj aĵoj estas en skatoloj kaj en sakegoj. Ĉiuj krom la lito, memkompreneble! Ĝi estas ne en, sed inter skatoloj kaj sakegoj.

Kiel mi konfesis en mia mallonga priskribo, mi estas samtempe senpacienca kaj prokrastema. Mi ne kapablas atendi, tial mi rapidis krei konton ĉe Ipernity. Aliflanke, mankis al mi diligento (kaj tempo) por detale konatiĝi kun la sistemo, do momente mi ankoraŭ mallertas kaj preferas ne tre aktivi.

Jen mia unua kontribuo. Ĝi fontas el revuo "AmUzE", kiun mi eldonis en 1999/2000. Kiu ne abomenas Latin3-tiparojn, povas legi la originalon ĉe: http://www.interpres.org/amuze

 PROKRASTISMO
(historiaj ekzemploj)

En 1984 oni petis la eminentan anglan fizikiston Rayleigh verki artikolon pri la lumo (angle: light) por enciklopedio. La artikolo ne estis preta ĝustatempe kaj ne povis aperi en la volumo "L". Bone", diris la redaktoro, "ni povas titoligi ĝin "optiko" (angle: optics). Sed ankaŭ por la "O"-volumo la teksto ne estis preta. Fine ĝi aperis sub titolo "Wave Theory of Light" - "Ondoteorio pri la lumo". (W estas en la fino de la angla alfabeto.)

Tiun tekston oni konsideras klasikaĵo de la fiziko kaj ĝis nun ĝi servas kiel ekzemplo pri profunda kaj klara verko pri la lum-teorio.

Noto de la redakcio: Se vi pensas, ke ni publikigas tiun tekston por pravigi la malfruiĝon de "AmUzE" 2/99, vi ne nepre pravas!