Universala Esperanto-Asocio's blog ^pro

Jules Deelder (1944) estas poeto, diskĵokeo kaj ĵaz-amanto, fama en la tuta Nederlando kaj mondfama en Roterdamo, kie lia hejmo troviĝas je ŝtonĵeto de la Centra Oficejo de UEA. En sia libro Tuj apude Humphrey Tonkin nomas lin bunta Roterdama poeto, kvazaŭ la laŭreato de la moderna iom senkompromisa urbo -- kaj ŝajne inventinto de la nomo Rotown por priskribi sian urbon (luda varianto de la usona nomo de la aŭtomobilfabrika urbo Detroit -- Motown). Tonkin daŭrigas: Jules Deelder ... nomas sin (angle) night mayor (nokta urbestro) de Roterdamo, kontraste kun la vera, taga urbestro. Sed tiuj, kiuj konas la anglan lingvon, scias ke night mayor kaj nightmare (koŝmaro) havas saman elparolon...

Rotown Magic, odo al Roterdamo, estas verŝajne la plej fama poemo de Deelder. Ĝi estis tradukita en Esperanton almenaŭ trifoje, de Wim Jansen, Wouter Pilger kaj Martin Minich. En la Nacia Vespero de la 93-a UK en Roterdamo Deelder mem legis ĉi tiun poemon kaj F.L. Veuthey legis ĝian Esperanto-tradukon. La itala esperantisto Mario Amadei registris parton de tiu ĉi programero per sia kamerao. Omaĝe al la 65-a datreveno de la poeto la 24-an de novembro 2009 UEA enretigis la filmeton en sia reta kinejo en Ipernity.

Mesaĝo de prezidanto Probal Dasgupta okaze de la 100-a datreveno de la naskiĝo de Ivo Lapenna (05 nov 1909 - 15 dec 1987). Lapenna estis estrarano de UEA de 1937 (Internacia Esperanto-Ligo ĝis 1947) ĝis 1974. Pro sia laboro kiel ĝenerala sekretario (1955-1964) kaj prezidanto (1964-1974) li estas nomata arkitekto de la moderna UEA.

Pli pri Ivo Lapenna: eo.wikipedia.org/wiki/Ivo_Lapenna kaj www.ivolapenna.org/.

La filmo Esperanto-fonto, kiun UEA prezentas ĉi tie, temas ne nur pri malnova ZEO en la hungara ĉefurbo. Ĝia dua parto montras historie valorajn scenojn el la 51-a UK en Budapeŝto en 1966, i.a. fragmenton el la inaŭgura festparolado de Ivo Lapenna. Okaze de la proksimiĝanta 100-a datreveno de la naskiĝo de Lapenna estas konvena momento ne nur aŭdi sed ankaŭ spekti la grandan oratoron.

Jen mallonga skizo pri la historio de la Esperanto-fonto laŭ Toponimio de Esperanto en Hungario de Árpád Rátkai; http://w3.hdsnet.hu/eszperanto/esperanto-toponimio-hungaria-2008-07-09.pdf