Kiel informas la kanalo "Rusio 24", Vlasenko supozeble korespondis en socia reto Vkontakte kun germana kuracistino Olga Wiber pri la provizado de la organoj interŝanĝe al la var-teknika provizado. En la informoj, ekzemple, la kuracistino insultas Vlasenkon pro malaltkvalitaj varoj, kaj tiu responde plendas pri malfacilaj laborkondiĉoj.


La sceneton pri tiu "korespondado" montris ankaŭ kanalo "Rusio 1" en sia resuma programo "Novaĵoj de la semajno kun Dmitrij Kiseljov".

Ankaŭ disvastiĝas la tradukoj de ĉi novaĵo germane, angle, svede kaj en aliaj lingvoj.


Semeno Semenĉenko tuj neis sian partoprenon en tiaspecaj intrigoj en sia Fejsbuk-paĝo.
"Gratulu min, miaj amikoj. Nun laŭ versio de TV-kanalo Rusio 24 mi havas negocon. Komercadon per homaj organoj akciante kun kun gesinjoroj Vlasenko, Nalivajĉenko kaj mistera Olga Wiber. Analizante la kvaliton de fantazio de la batalantoj de agitpropagando de Rusio , familnomo por simpleco estas prenita el la titolo de bona programo Viber. Mi jam alkutimiĝis al tio, ke mi estas koncentriĝo de ĉiuj signoj de heroo el hororfilmo, sed la kvalito de tiu ĉi fantazio de "Rusio 24" agrable surprizis. Do oni elĉerpiĝas, do la venko proksimas”, – skribis li.


Stopfake.org interparolis kun loĝantino de Germanio Olga Wiber, menciita en tiu ĉi historio.

"La tuta informo pri mi estas el interreto. Resume, fotoj, ktp ankoraŭ antaŭ lanĉo de la falsaĵo estis kopiitaj, kaj nun multobliĝas kaj distordiĝas en miloj da blogoj kaj skribaĵoj. Ĵus estis publikigita la artikolo en iu portalo "Voĉo de Sevastopolo", min inundis centoj da mesaĝoj kun minacoj kaj la plej sovaĝaj insultoj. Estas sento, ke la tuta armeo de propagandistoj ricevis ordonon, post kiu ili samtempe ekpafis ", – diris Olga Wiber.

"Mi ne estas kuracistino, mi persone ne konas s-ojn Vlasenko kaj Semenĉenko. Kaj ĝenerale, la teksto mem – mendo de la 15 koroj, 63 renoj, ktp – estas tuta profanaĵo. Tio ja ne estas buĉista vendejeto", – asertas Olga.

Post kiam ĉi falsaĵo vaste disvastiĝis, germanaj ĵurnalistoj decidis senmaskigi ĝin. Ekzemple, germana ĵurnalisto, raportisto kaj gvidisto de okcidentgermana radiostacio WDR Horst Klojzer (Horst Kläuser) faris radioelsendon, en kiu li ne nur interparolis kun Olga Wiber, sed apelaciis al la Germana Federacia Ministerio pri sano, kaj ankaŭ al la Germana fondaĵo pri transplanto de organoj. Tie oni konfirmis, ke estas neniu signo, kiu indikus, ke simila neleĝa komerco povus okazi.

La elsendo en ka plej proksima tempo devas aperi en la etero. Stopfake.org publikigas ligon kun ĝi, ankaŭ la tradukon de la teksto angle kaj la ruse.

Tamen, jam nun estas eble provanalizi la informon, donitan en la sceneto, el la vidpunkto de saĝa racio. Unue, se tia komerco vere okazus, grave vunditan soldaton oni devas tuj transporti al altteknologia hospitalo por la forigo de la organoj. Due, konsiderante tre mallongan tempodaŭron de konservebleco de forigitaj organoj (ĝis ok horoj), atendante la varon devas konstante deĵori la aviadilo por transporti ĝin. Trie, la paciento en Germanio jam devas esti preta por operacio kaj kuŝi sur la operacia tablo. Samtempe, ricevitaj organoj povas esti ne taŭgaj por li. Ĉi tion oni devas tre rapide kontroli en specialaj laboratorioj. Kvare, la germana kliniko, efektiviganta transplanton, devas havi ĉiujn necesajn dokumentojn pri deveno de la organoj. En Germanio tio estas tre strikte kontrolata.

Pro tio rusiaj kanaloj, antaŭ ol peni konvinki pri io siajn spektantojn, unue prezentu pruvojn de siaj senbazaj asertoj. Nome, eblojn organizi rapidan transportadon de grave vunditaj soldatoj de batalkampo; altteknologian klinikon en Ukrainio, kapablan realigi tiajn operaciojn; konstante deĵorantan aviadilon en ukrainia flughaveno; dokumentojn el germana kliniko, konfirmantaj la originon de forigitaj organoj.