Ateisto? Jes, budhisto.

Ĝi estas kajero apenaŭ 80-paĝa kaj nomiĝas "KELKAJ FAKTOJ PRI LA BUDHISMO". Mi ĝuas la legadon. Gunnar (lia familia nomo elparoliĝas "Jelmu") skribis interese kaj resume pri ekesto de budhismo, pri ĝiaj ideoj kaj pri la evoluo de tiu movado.

Antaŭ nemultaj jaroj mi finfine forlasis kristanismon, pri kiu mi eĉ de infanaĝo sentis ke ĝi ne kongruas kun mia homa kapablo pensi logike kaj ke ĝia dio estas malmorala estaĵo. Antaŭ jaro mi kun granda "anima profito" legis libron de Richard Dawkins, "La Dia iluzio", kaj konstatis ke jes, mi staras sur firma bazo dirante ke mi estas ateisto. Poste, en la libro de Stephen Hawking, "Mallonga historio pri Tempo", mi legis ke pri la momento antaŭ la bigbanga ekesto de nia mondo neniom scieblas kaj ke tia demando eble eĉ ne havas sencon. Kaj nun per ĉi tiu libro de Gunnar mi komprenas ke ĉio tio kongruas kaj pravas, ke ateismo havas sencon kaj sciencan kaj moralan kaj ke ĉi tie mi verŝajne trovis la celon kiun mi serĉis ek de kiam mi, infano, komencis cerbumi pri la limoj de la universo, de mia esto kaj de ĉies kialo.

Mi rekomendas la menciitan libron de Richard Dawkins. La angla originalo titolas "The God Delusion".

Mi rekomendas la libreton de Gunnar Gällmo. Ĝi estas valora komplemento por moderna ateismo.

Se vi volas science profundiĝi en tiuj kampoj, pri kiuj al Budho mankis rimedoj (sciiloj), mi rekomendas ankaŭ verkon de Stephen Hawking.

Ĉio kongruas.

Jen taŭga religio. Mi estos budhisto (kvankam iom pagana pro lokaj tradicioj).

Dankon, Gunnar.