Aloisio Sartorato's blog/

Hodiaŭ, sabate, la 14-an de Februaro, je la 10-a, okazis, en Rio de Janeiro, la inaŭgura ceremonio de la nova sidejo de Asocio Esperantista de Rio de Janeiro (AERJ), institucio kiu estis fondita la 30-an de marto 1942.

Ĉirkaŭ 30 gesamideanoj ĉeestis la eventon, kiu estis malfermita de Paulo Carvalho, prezidanto de AERJ. En sia parolado li faris omaĝon al la fondintoj de la Asocio. Sekve li invitis la ĉeestantojn kanti la himnon "La Espero". Poste komenciĝis la transdono de omaĝplatoj al pluraj personoj, kiuj iam aŭ iamaniere helpis la Asocion en la daŭro de ĝia ekzistado. Sekve Walter Fontes, vic-prezidanto de AERJ, legis la protokolon pri la fondo de AERJ kaj iun alian, kiu registris la ŝanĝon de la nomo de la asocio de Asocio Esperantista do Meyer al Asocio Esperantista de Rio de Janeiro. Poste oni transdonis la parolon al la veterana esperantisto Jorge Campos de Oliveira, la plej malnova ano de AERJ, kiu faris mallongan trarigardan prelegon pri la historio de la institucio. Prezidanto Paulo alvokis la ceterajn membrojn de la estraro por kuninaŭguri platon omaĝantan la kunfondintojn de AERJ. Ĉe la fino okazis koktelo kun manĝaĵetoj.