Գերմանահայոց Կեդրոնական Խորհուրդը լռելու խոհեմութիւնը չունեցաւ այս անգամ եւս: Յայտարարութիւն մը հրապարակեց, որ լուսնոտութեան ափերը կը քերէ:

Թուրքիոյ վարչապետ Էրտողան այցելած է վերջերս Գերմանիա, ուր պաշտօնական հանդիպումներուն քով տեսնուած է տեղացի թուրքերուն հետ: Կարեւորագոյն ելոյթն ալ ունեցած է մարզադաշտի մը մէջ, հազարաւոր ոգեւորուած ներկաներուն առջեւ:

Գերմանահայ կեդր.խորհուրդը պարտականութիւնը սեպեց «հակազդելու»: Էրտողան կը յօրդորէ որ գերմանաբնակ թուրքերը դպրոցներ ունենան եւ նոյնիսկ թրքական համալսարան մը հիմնեն:

Չենք ուզեր -- փութով մէջը կ'իյնայ ԳՀԿԽը: Ազգային փոկրամասնութիւնները համարկումի պէտք ունին եւ ոչ թէ իրենց իւղին մէջ տապկուելուն: Համարկո՜ւմ:

Նայեցէք թէ մենք հայերս ի՜նչ օրինակելի համարկուող ենք: Մեր կրթական բոլոր հաստատութիւնները փակած ենք՝ տեղացի ժողովուրդներուն մէջ լուծուելու համար:

Եւ օտար երկրի մը մէջ հայկական համալսարան մը հիմնելու յանդգնութիւնը չունինք:

Անքարա ոտնձգութիւն մը կը կատարէ Գերմանիոյ կրթական կալուածէն ներս, կ'աղաղակէ Գերմանահայոց ԿԽը: Օրինակ առէք մեզմէ. մենք ոչ թէ ուրիշին գործին կը խառնուինք, այլ ընդհակառակն՝ աշխարհը կը հրաւիրենք որ մեր դպրոցներուն ծրիագիրը ճշդէ: Մեր հատուկենտ վարժարաններուն աշակերտները օտար քննութիւնները կու տան, որպէս զի մեր վկայականը ճանչցուի:

Եւ հարկաւ Գերմանահայ ԿԽը չկրցաւ ցեղասպանութեան ալ նիւթը մէջը չնետել այս խնդրին մէջ, թէեւ թուրք գաղութին ներքին կեանքին հետ ի՞նչ կապ ունի ան...