Falus' el Mileto

Falus’ el Mileto (ĉ. 333 j. AK)

(poezia heredaĵo)

* * *

Rondoj koncentraj disfluas laŭ akva kvieto -

Baldaŭ ekflustros susure ĉeborda kanaro...

Ŝvebas gracia nubet’ – ĉu anim’ de l’

droninto?

* * *

Sciu: edene ĝuinda ‘stas granda persiko,

Mordu vi ĝin, kaj laŭ brakoj ekfluas

nektaro!

Kial vi gapas kolere, ho ajlomanĝanto?

* * *

Aĥ, kiom tente moviĝas du sferoj dum iro!

Vidu, amik’, antaŭ ni la tunikon

streĉitan!

...Kara edzinjo, ĉu ankaŭ vi tion aŭskultis?

* * *

Diris najbaroj, ke lakto kaprina utilas –

Bruton kun barbo kaj kornoj akiris mi

verve ...

Diru najbaroj nun, kial do mankas

melkujo?

* * *

Vere fastado bonigas kaj sanon kaj

menson:

Sklavon-poeton ne nutris mi dum tri

tagnoktoj –

Aron da brilaj poemoj li kreis, kanajlo!

* * *

Vintro ĉe ŝtorma forpaso renkontas

printempon,

Rojo riveron renkontas ĉe l’ fino de fluo...

Mi, grizharul’, devas gapi al greg’ idiota!

* * *

Rozoj purpuraj printempe signifas amoron,

Rozoj purpuraj aŭtune signifas sopiron:

Juna Talia por mi jam nenion signifas...

* * *

Mar’ malavara donacas kareson de l’ ondoj,

Mar’ malavara min lulas tenere kaj ame, -

Mia aminda, do estu vi mar’ malavara!

* * *

Se en kaldronon da lakto enrampas vipero,

Tute ne nepre la lakto fariĝas venena,

Sed mi hezitas gustumi – ĉu eble pro sato?

* * *

Jen la bubaloj – bonegaj brutaĉoj en tuto –

Trenas plugilon aŭ ĉaron sen plendo

protesta,

Kaj sen demandi signifon de l’ vorto

“libero”...

* * *

Iu preferas brunharajn fraŭlinojn al blondaj,

Iu – la akvon sengustan al vino gajiga.

Mi, do preferas ne aŭdi konsilojn de tiuj.

* * *

Manĝo de pir’ ekputrinta provokas

laksadon,

Manĝo de pir’ malmatura la samon

provokas...

Taŭgus konklud’, sed mi manĝas nur sekajn

daktilojn.

* * *

Loĝas la glora Diar’ en transnuba Olimpo,

Punas pekulojn per fulm’, incendio aŭ morbo...

Kial ricevas ni ankaŭ la punojn de teraj regantoj?

* * *

Frua mateno. Sklavinoj prizorgas vitejon.

Ludas aŭroro globetojn de l’ mamoj kaj beroj.

Ho, kiom dolĉan aspiron provokas ĉi ludo!

* * *

Sonas simile la vortoj “heder’” kaj “hetajro”:

Unu sin kroĉas al mur’, la alia al viro.

Kial sin trudas, kroĉante, najbar’-filozofo?

* * *

Dum mia vivo mi fajfis pri rangoj, postenoj,

Gravis por mi nur liber’, pergamen’ kaj skribilo.

Fajfus mi plu ankaŭ nun, sed forfalis la dentoj.

* * *

Sorto – la in’, kiu homon elprovas turmente;

Morto – la in’, kiu donas kvietan ripozon;

Restu kun mi la unua, la dua ne hastu...

* * *

Fluis en nokto la kant’ de virina feliĉo.

Ĝin anstataŭis subite ekjelpo akuta –

Ŝi ne supozis, ke l’edzo revenos tro frue.

* * *

Amis min Ĥloe sindone, kun ard’ incendia,

Amis min Asta – la am’ inkandeske bruligis...

Flam’ estingiĝis. Brulvundoj turmentas la

koron.

* * *

Plendis porkaĉo pri l’ gusto de freŝaj ĉerizoj.

Sakris kapraĉo dum aŭdo de tril’ najtingala.

Pensu, profan’, antaŭ juĝi pri miaj poemoj...

majo-julio 2005

__________ ESET Smart Security, 3984 (20090402) __________

ESET Smart Security.

http://www.esetnod32.ru