Unua bloko : 9h00-10h30

Salono Dao Anh Kha
1. Kiel recenzi diskon
Paul Gubbins

Aperas ĉiumonate novaj kompakt-diskoj de esperantaj kanzonistoj kaj aliaj muzikistoj. Ofte ilin ni ne rimarkas, ĉar mankas recenzoj. Kaj mankas recenzoj, ĉar homoj hezitas - eventuale pro nesperto pri la arto recenzi - surpaperigi siajn opiniojn, siajn impresojn. Ĉi tiu sesio esploros kiel recenzi KD-ojn kaj de teoria kaj, pli grave, de praktika aspektoj. Ni diskutos i.a. kio estas recenzo; ĉu, recenzante, ni esperantistoj tro indulgas niajn artistojn; kiom permeseblas de etika kaj jura vidpunktoj vere kritiki; kaj fine, surbaze de disaŭdigitaj muzikeroj, ni verkos niajn proprajn, specimenajn recenzojn.



Salono Broadribb
2. Kanti kaj babili kun Manŭel FACILA
Manŭel

Manŭel prezentos kelkajn el siaj kantoj kaj instigos vin kanti kune sekvante simplajn videotekstojn kaj spektante kantofilmeton pri stranga kaj simpatia kato. Ankaŭ li instigos vin konversacii per simplaj vortoj, tiel ke ĉiuj trovos bonan ŝancon por facila kaj amuza babilado.



Salono Beleva
3. Unuiĝintaj Nacioj: Cele al pli bona mondo
Humphrey Tonkin kaj Stefano Keller

Kiel ĉiuj politikaj organizaĵoj, UN estas komplika, malrapida, kaj plena je diversaj vidpunktoj. Sed ĝi faras valoran laboron, kiun la homoj ĝenerale nesufiĉe bone konas. La celo de tiu ĉi seminario estos klarigi la laboron de UN kaj montri kial esperantistoj devus sin engaĝi en tiun laboron kaj kiel tion fari.



Salono Bormann
4. Novaj projektoj de E@I kaj ilia utilo por Esperanto
Peter Baláž kaj Jevgenij Gaus

Skiza prezento de la plej freŝaj aktivecoj de E@I - ĉu retaj projektoj, ĉu aranĝoj aŭ eldonaĵoj. Venu ekscii ĉion kion vi povos praktike utiligi kaj eventuale eĉ kunlabori. Prezentitaj estos projektoj: nova lernu.net, lingvo.info, deutsch.info, monda.eu, www.komputeko.net, www.vortaro.net (reta PIV), SES, KAEST, planoj por baldaǔaj projektoj, ktp.

Salono Hirsch
5. Utiligado de Esperanto
HORI Jasuo
Esperanto estas tre utila por kolekti kaj disdoni diversajn informojn kaj novaĵojn, ĉar esperantistoj sinceraj kaj kleraj loĝas en diversaj landoj kaj respondas al diversaj petoj. Kaj tio estas la plej granda avantaĝo de Esperanto, kaj tion aliaj lingvoj ne havas. La preleganto montros, kion li faris okaze de la katastrofo en 2011 en Japanio.

Dua bloko : 10h45-12h15

Salono Dao Anh Kha
1. Kunkreu elsendon por Muzaiko!
Volontuloj de Muzaiko (Julia Noe, Veronika Poór, Rafael Henrique Zerbetto, kaj aliaj)

Muzaiko (www.muzaiko.info) estas tuttempa tutmonda tutmojosa tutesperanta retradio-kanalo, kiu ludas por vi 24 horojn en diurno muzikon, programerojn, novaĵojn, informojn, raportojn, arkivaĵojn kaj multe pli! Ĉu vi havas ion por diri al la tuta mondo? Jen ebleco por vi tion fari. Dum la sesio jam spertaj kontribuantoj de Muzaiko helpos vin lerni kiel - de la registrado ĝis la alŝutado de la preta elsendo. Oni eĉ kreos veran elsendon, laŭtlegos tekstojn. Venu por spertiĝi kaj krei! Se eblas, kunportu al la sesio komputilon, kapaŭskultilon kaj registrilon.


Salono Broadribb
2. Tradukado multlingva
Brian Moon

Ĉar ni ne uzas nian lingvon en glora izoliĝo disde la cetera mondo, ĉiu uzanto de Esperanto pli-malpli ofte konfrontiĝas kun problemoj de tradukado inter Esperanto kaj naciaj lingvoj. Por reliefigi la interlingvajn problemojn el iom alia perspektivo, mi proponas konsideri la situacion en multlingvaj organizaĵoj kiel Eŭropa Unio.
Sur bazo de praktika tradukado de specimena teksto jam ekzistanta en diversaj lingvoj, inkluzive de la islanda, ni iom esploros la avantaĝojn kaj la problemojn de Esperanto en tiu ĉi kampo.


Salono Beleva
3. Ni konservu nian historion: problemoj de esperantaj bibliotekoj kaj arkivoj
Detlev Blanke kaj Roland Rotsaert

La aranĝo prezentos kaj diskutigos la aktualan situacion de esperantaj bibliotekoj kaj arkivoj (=kolektoj), substrekos la rolon de la reto kaj mencios kelkajn statusajn (i.a.jurajn) aspektojn, kiuj influas la perspektivojn de la kolektoj.

Salono Bormann
4. Esperanto kaj Interreto - kiel ilin kune uzi pli efike
Peter Baláž kaj Jevgenij Gaus

Baza prikomputila instruado kun la fokusiĝo al Esperanto - prezento de retaj aktivecoj aŭ programoj, kiuj utilas por E-istoj; - kiel pli efike serĉi informojn en la reto; - kiel tajpi ĉapellitere; - kie kaj kiel serĉi E-enhavon, ...kaj aliaj bazaj scioj, utilegaj por E-istoj.
La sesio taŭgas por ne-spertaj uzantoj de komputiloj aŭ/kaj de la reto. Se eble kunportu propran komputilon.

Salono Hirsch
5. Bona IDEO: realigo de Grundtvig-projekto
Mirejo Grosjean kaj Claude Nourmont

Dum du jaroj kvar Esperanto-asocioj el malsamaj landoj (Francio, Germanio, Katalunio, Svislando) partoprenis en Grundtvig-projekto (subvenciita de eŭropaj instancoj) laŭ la temo : Interkultura edukado, defio por diverseca Eŭropo (IDEO). Tiu ĉi sesio prezentos la diversajn etapojn de la projekto kaj ĝian rezulton: la retpaĝaro www.noos.ch/ideo . Oni ankaŭ diskutos pri la diversaj problemoj kiujn oni renkontas en tiaj projektoj.


Tria bloko: 12h30-14h00

Salono Dao Anh Kha
1. Klerigaj ludoj en Kleriga Lundo
Ana Montesinos
Ĉu lernado devas esti enuiga kaj seka? Kompreneble, tute ne. Sed se oni ĝin ĝuas, multe pli bone, ĉu ne?
Do, se via vortprovizo iomete rutinas, vi ankoraǔ timas paroli, frazoj ne tre facile fluas, aǔ tute simple vi volas praktiki Esperanton per historietoj, ktp, kuraĝu kaj venu, ĝuu -kaj jes, ankaǔ lernu- kune kun ni per la "Klerigaj ludoj en Kleriga Lundo".


Salono Broadribb
2. “Ĉu mi bone komprenas vin?”. Konsiloj por klare kaj efike komuniki en Esperanto
Kristin Tytgat

Sukcese komuniki kun ĉiuj esperantistoj de la mondo ne estas facila tasko, eĉ se ni ĉiuj parolas unu komunan lingvon.
Ĉar la alia persono en la konversacio eble venas el por vi tute ne konata kulturo, li aǔ ŝi povas reagi strange al via mesaĝo kaj povas kompreni vin en tute alia maniero.
Dum tiu ĉi sesio ni uzos konkretajn ekzemplojn kaj provos trovi kelkajn ĝeneralajn konsilojn, kiuj helpos pli klare kaj efike komuniki.


Salono Beleva
3. En la spuroj de Tibor Sekelj: de Nepalo al Akonkagvo FACILA
Amri Wandel

Perbilda facila prelego pri kelkaj el la vojaĝoj de la preleganto(Nepalo, Kilimanĵaro kaj laste Akonkagvo), laŭ la spuroj de la plej fama esperantista vojaĝanto: Tibor Sekelj. Grimpante tiun plej altan monton en Ameriko, li sekvis la faman libron de Sekelj, "Tempesto super Akonkagvo".

Salono Bormann
4. Malkovru la novan lernu.net
Erin Piateski

lernu! ekzistas jam pli ol 10 jaroj. Kun 150.000 registritaj uzantoj
kaj 150.000-200.0000 vizitantoj ĉiumonate lernu! estas la plej efika
varbilo por Esperanto. Dum la tuta ekzisto lernu! unu fojon estis
renovigita teknike kaj aspekte kaj nun venas tempo por ankoraŭ unu
renovigo. Ĉi-foje ĝi estos ege profunda kaj plene ŝanĝos kaj enhavon
kaj teknikan flankon de la projekto. La preparoj de la nova versio jam
venas al la fino kaj la projekto bezonas helpon de multaj personoj.
Dum la prezento oni ekscios pri la venantaj ŝanĝoj, konatiĝos kun la
nova enhavo kaj ekscios pri la kunlabor-ebloj.

Salono Hirsch
5. Kiel popularigi la Esperanto-literaturon
Michela Lipari, Humphrey Tonkin, HORI Jasuo, Veronika Poór, USUI Hiroyuki, Paul Gubbins …

Ni ĉiuj fieras pri la diverseco de verkoj en Esperanto kaj la multeco de libroj, kiuj aperas en nia lingvo. Tiuj libroj vendiĝas, eĉ se malgrandkvante. Sed kiu fakte legas Esperanto-literaturon? Kaj ĝis kiu grado ekzistas komunumo de legantoj, kiuj interŝanĝas siajn opiniojn pri la enhavo kaj kvalito de nia literaturo? Sen tiu vigla komuna kulturo, literaturo apenaǔ povas vivteni sin. Kion fari por intensigi la legadon de nia literaturo, la interŝanĝon de opinioj kaj ideoj pri ĝi, kaj la moralan subtenon al niaj verkistoj?