FEL prezentas siajn e-librojn

Dankon pro la informo!

Unue, mi aplaŭdas la iniciaton de FEL: tia estas la estonteco!

Sed aliflanke, min elrevigas la prezoj de la libroj! Ne klaras kial ili tiel multekostas, se la plej granda elspezo -presado- ne ekzistas!

Se temus pri novaj libroj, oni povus argumenti ke presado plu ekzistas, kaj ke parto da la vendotaĵo iros elektronike, do la ŝarĝo iru ankaŭ tie (tio estas mola argumento, kiu nur montras ke ne indas samtempe eldoni papere kaj elektronike).

Sed en sufiĉe malnovaj libroj, kies presado estas jam amortizita, tiaj prezoj tute ne indas!

Krome mi havas teknikan demandon: ĉu la e-eldono estas PDF-e, kiel la specimeno atestas? Se jes, la apuda bildo de e-libro per iPhone estas iom trompa, ĉar tian bildon produktas leg-programoj nutrita de flekseblaj formatoj (EPUB, PRC, TXT... ktp), sed ne de PDF.

Mi sekvas kun intereso la aferon...

Volonte ni respondas al viaj du demandoj:

Efektive, la pres- kaj bindo-kostoj forfalas, sed restas ĉiuj aliaj kostoj: la salajro de la grafikisto, reviziisto, administranto ... (FEL havas salajratajn dungitojn), la imposto (FEL ne kaŝe eldonas, sed devas pagi imposton al la belga ŝtato), la honorarion de la aŭtoro kaj eventuale tradukisto (FEL opinias, ke estas honeste pagi siajn aŭtorojn kaj tradukistojn) ... Krome ekzistas la ĝeneralaj kostoj, ekzemple la kostoj de la servilo de la retbutiko, ktp ktp.

La bildo ne estas trompa. Ekzistas diversaj formoj de PDF. Se vi elŝutos nian testlibron, vi vidos, ke efektive la linioj "flosas". Do se vi elektas pli grandan litertiparon, la fino de la linio estos en alia loko ol se vi elektus malpli grandan.

Mi konsentas kun Manolo: la novaĵo pri venontaj e-libroj estas ege bonvena, sed nur se la havebla(j) formato(j) estas sufiĉe fleksebla(j). Krom tio, ke PDF-dosieroj ne estas legeblaj per pluraj legiloj, la formato kutime ne permesas refaldadon de linioj—grava afero kun legiloj de diversaj larĝecoj kun diversaj tiparoj. Bonvolu uzi ion k.e.p. universalan, ekz. EPUB-formaton.

Ni povas aldoni, ke ekde la 1a de decembro aldoniĝis al nia oferto ankaŭ EPUB-libroj kaj libroj por Mobipocket.

Mi ne preferas NUR e-libron. Se mi aĉetas e-libron, mi volas ordinaran version ankaŭ

Tio ne estas problemo. Tiu, kiu aĉetas paperan libron, povas ricevi la PDF-version senpage. Necesas nur tion klare mencii okaze de la mendo ĉe FEL.

e-libroj havas avantaĝoxjn, sed ankaŭ malavantaĝojn. (kaj neebla kopii ion ajn de ĝi, nek presi ĝin, aŭ eĉ kiam oni rajtas, tio donas A4 formatajn foliojn unuflanke presitaj kaj ne binditaj (kaj kostas inkon de presilo kaj tempo por uzi ĝin, eble pli kostas ol aĉeti) maloportunaj por manipuli, kaj oni ne havas la libron enmane. Kaj estas laciga legi sur l'ekrano, streĉsidante sur sia seĝo.
La ununura avantaĝo de e-libroj estas, ke ili estas senpage, kaj tiel oni povas esplori, kaj eble malkovri, neantaŭpensitaj interesaĵojn. Sed se la libro plaĉas al mi mi preferas havi ĝin en papera formo.

Nu jes, tiuj impresoj viaj estas tre personaj. Laŭ mi e-libroj ankaŭ havas multajn avantaĝojn. Kiam mi volas legi en mia lito, tiam estas multe pli oportune havi en la mano mian iPhone, kiu pezas nur 100 gramojn, ol havi en la manon la originalan libron, kiu pezas 400 gramojn. Krome la libron mi devas teni per du manoj (se ne ĝi ĉiam riskas fermiĝi de si mem), dum mian legilon mi facile povas teni per unu mano.
FEL proponas al siaj klientoj la 3 alternativojn (papera libro, PDF-libro kaj ePub-libro) tiel ke ĉiu povas facile decidi por si mem.

Bedaŭrinde ĉi-blogere forestas Jorge Camacho, kiu nepre korektus vin: "Ne e-libro, sed bitlibro!"