Sidneja lingvo-festivalo

La unuan de junio 2013 okazis lingva festivalo en la universitato Macquarie en Sidnejo, Aŭstralio. Ĝi estis organizita de la Esperanto federacio de Novsudkimrujo kune kun la universitato Macquarie. La festivalo komenciĝis je la 10a30 matene. Unue du personoj el la universitato parolis, poste Richard Delamore bonvenigis en granda ĉambro la ĉeestantojn nome de la Esperanto federacio kaj iomete klarigis pri Esperanto kaj ĝia historio.

De la 11a horo ĝis la 12a30 okazis 30 minutaj prezentoj de lingvoj. Okazis proksimume 6 prezentoj samtempe. Eblis bedaŭrinde ĉeesti nur 3 prezentojn maksimume. La prezentoj estis faritaj plejparte de Esperantistoj aŭ instruistoj de la universitato Macquarie.

Okazis 3 prezentoj pri artefaritaj lingvoj. Unue pri Esperanto prezentita de Trevor Steele kaj Richard Delamore. Richard kun juna vigleco rapide prezentis la lingvon kaj Trevor iomete paroligis la ĉeestantojn. Proksimume 30 personoj ĉeestis, plejparte junaj studentoj. Poste Jonathan Cooper, Esperantisto, prezentis aliajn artefaritajn lingvojn. Li klarigis, ke ekzistas multaj, ne nur Volapuko kaj ekzistas ankaŭ tre malnovaj ekzemple Lingua Ignota, kreita jam en la 12a jarcento. La 3a prezento pri artefaritaj lingvoj temis pri la lingvo Fitusa kreita en 1935. Alan Libert, profesoro pri lingvistiko en la universitato de Novkastelo priskribis tiun lingvon. Alan tre interesiĝas pri artefaritaj lingvoj kaj scias multon pri Esperanto. Li iom lernis Esperanton, kapablas legi ĝin, sed ne vere estas Esperanto-parolanto. Li elektis paroli pri Fitusa kiu estas tute ne konata lingvo. Ĝi estas aprioria lingvo, ne kiel Esperanto kiu estas bazita sur naturaj lingvoj. Tamen Fitusa iom similas al Esperanto: substantivoj finiĝas per o, adjektivoj per a, verboj per i. La vortoj plejparte ne estas bazitaj sur ekzistantaj lingvoj, tamen “pafi” signifas “to shoot”. Laŭ tio kion mi komprenis la plej originala kaj interesa fakto pri tiu lingvo estas ke similsencaj vortoj estas similsonaj, ofte kun nur unu malsama vokalo. Kuracisto estas “taf”, dentisto “tif”, litero estas “saf”, silabo “sif”, vorto “sof” kaj frazo “suf”. Kvankam tio ŝajnas logika solvo, en praktiko ĝi supozeble ne estas tre bona, ĉar se oni misaŭdas vokalon, oni miskomprenos. Deko da personoj ĉeestis tiun prelegon.

Aliaj lingvoj prezentitaj de Esperantistoj estis la korea de Ĵo Turvey, la hungara de Sandor Horvath kaj la angla lingvo de Marko Schmidt, aŭtoro de Rakonto de ovoj. Strange nur 6 personoj ĉeestis la prezenton de la angla lingvo. Ĉu ili pensas, ke ili jam sufiĉe scias pri la angla? Marko atentigis pri vortoj kiel “go off”. Multaj fremduloj miskomprenas ilin ĉar ili ne scias ĉiujn signifojn de tiuj vortoj.

La frato de Jonathan Cooper, kiu estas lingvisto, faris du prezentojn: pri la endanĝerigita kalaŝa lingvo parolata en parto de Pakistano kaj la dua prezento temis pri la Urdua kaj Hindia lingvo.

Je la 12a30 komenciĝis la koncerto. La unua kanto estis tiu de grupeto de Esperantistoj. Ili kantis Waltzing Matilda en Esperanto antaŭ granda publiko. Sekvis kantoj en la rusa, itala, japana kaj ĉina.

Konklude ĝi estis tre sukcesa evento, sed mankis tempo por babili kun la ĉeestantoj. La duonhoraj prezentoj estis laŭ mi tro mallongaj, devus esti eble 15 pliaj minutoj por havi tempon por fari multajn demandojn. Krome devus esti almenaŭ 10 minutoj inter la prezentoj por iri al alia ĉambro, ktp. Ekzemple la dua prezento kiun mi ĉeestis finiĝis kun 5 minutoj da malfruo kaj do absolute tuj venis la venonta prezento, eĉ ne estis tempo por iri al necesejo. Tuj post la fino de la 3a prezento komenciĝis la koncerto. Laŭ mi devintus esti 15 minuta paŭzo kaj tiam oni povus interŝanĝi kelkajn impresojn pri la lingvaj prezentoj kun aliaj ĉeestantoj antaŭ ol aŭskulti la koncerton. Iel Roger tamen sukcesis fordoni proksimume 300 ekzemplerojn de la ŝlosillibreto.

Krom lokaj Esperantistoj, en la festivalo partoprenis 4 Esperantistoj el Adelajdo kaj 2 el Melburno. Post la koncerto grupo da Esperantistoj kune manĝis.

Multaj ja aŭdis pri Esperanto dum la festivalo. Eble iuj nun scivolemas kaj provos uzi la reton por pli profunde informiĝi.

Vidu filmetojn pri la festivalo:
www.youtube.com/watch?v=xH2uOUWyas4
www.youtube.com/watch?v=PMhYn0WHBP0
www.youtube.com/watch?v=WWRyWh-F5IM
www.youtube.com/watch?v=eMvXH-i8a0Q
www.youtube.com/watch?v=tDKkT589eZw